બીયર, બિરયાની અને ગુટખાથી બેગમ બની હિંસક...! સિગારેટથી પતિને આપ્યા ડામ

યુપીના બિજનૌરમાં એક મહિલાએ તેના પતિની છાતી પર બેસીને તેના શરીરને સિગારેટથી ડામ આપ્યાના મામલામાં પીડિતએ પોલીસ સ્ટેશનમાં પત્ની વિરુદ્ધ FIR નોંધાવી છે. પતિની ફરિયાદના આધારે પોલીસે આરોપી મહિલાની ધરપકડ કરી છે. મહિલાએ તેના પતિને ડામ આપ્યાના સીસીટીવી ફૂટેજ પણ સોશિયલ મીડિયા પર વાયરલ થયા હતા.

હવે મેહર જહાં નામની આ મહિલાના પતિએ કરેલા ખુલાસા ખૂબ જ ચોંકાવનારા છે. પીડિત પતિ મન્નાન  ઝૈદીએ કહ્યું કે બિયર, બિરયાની, સિગારેટ અને ગુટખાના વ્યસનથી તેની પત્ની હિંસક બની ગઈ છે.

સ્થાનિક મીડિયાના અહેવાલો અનુસાર, પતિએ કહ્યું કે જ્યારે આ વસ્તુઓની માંગ પૂરી ન થઈ, ત્યારે મેહર ઘણીવાર તેના પર હુમલો કરતી હતી અને તેને ફસાવવાની ધમકી પણ આપતી હતી. પીડિતાના પતિ મન્નાન ઝૈદીએ જણાવ્યું કે તેણે મેહર જહાં સાથે લવ મેરેજ કર્યા હતા, પરંતુ લગ્ન થતાં જ તેનો સ્વભાવ બદલાઈ ગયો અને તેણે નશાની હાલતમાં તેના પર હુમલો કરવાનું શરૂ કરી દીધું.

હવે તેના પતિની ફરિયાદના આધારે સિઓહારા પોલીસે મેહર જહાંની ધરપકડ કરી છે. તેના પતિ મન્નાન ઝૈદીનો આરોપ છે કે મેહરે પહેલા તેને ડ્રગ્સ પીવડાવ્યું અને પછી તેના હાથ-પગ બાંધી દીધા અને સળગતી સિગારેટ વડે તેના શરીરના ભાગો પર ડામ આપ્યા હતા. 

સળગતી સિગારેટના CCTV ફૂટેજ વાયરલ

પતિએ પોલીસને ઘરની અંદરથી સીસીટીવી ફૂટેજ આપ્યા, જેમાં મેહર જહાં તેના પર શારીરિક હુમલો કરતી, તેના હાથ-પગ બાંધી અને તેની છાતી પર બેસીને તેનું ગળું દબાવવાનો પ્રયાસ કરતી જોવા મળે છે.

વીડિયોમાં તે સળગતી સિગારેટથી તેના પતિના શરીરના ભાગો પર ડામ આપતી જોઈ શકાય છે. મન્નાન  ઝૈદીએ દાવો કર્યો છે કે તેણે અગાઉ પણ પોલીસમાં ફરિયાદ નોંધાવી હતી, જેમાં તેણે તેની પત્ની પર નશો કરીને તેને ત્રાસ આપવાનો, તેના હાથ-પગ બાંધવાનો અને તેની સાથે દુર્વ્યવહાર કરવાનો આરોપ લગાવ્યો હતો.

પોલીસે અનેક કલમો હેઠળ કેસ નોંધ્યો હતો

હવે પોલીસે મેહર જહાં વિરુદ્ધ આઈપીસીની વિવિધ કલમો હેઠળ હત્યાનો પ્રયાસ, હુમલો અને ત્રાસ સહિતનો કેસ નોંધીને તેની ધરપકડ કરી છે. પોલીસ અધિક્ષક ધરમપાલ સિંહે કહ્યું, 'ફરિયાદના આધારે પોલીસે આરોપી મહિલા વિરુદ્ધ સંબંધિત કલમો હેઠળ રિપોર્ટ નોંધીને તેની ધરપકડ કરી છે. આગળની કાર્યવાહી હાથ ધરી છે.