'સરકાર વિરોધ પ્રદર્શનોથી આટલી ડરે છે કેમ?' સુપ્રીમ કોર્ટના ચુકાદાનો હવાલો આપી અસદુદ્દીન ઓવૈસીએ કેન્દ્રને લીધું આડે હાથ

દિલ્હીમાં ઐતિહાસિક પ્રદર્શન સ્થળ ગણાતા જંતર-મંતરને પ્રદર્શન સ્થળની યાદીમાંથી ડી-નોટિફાઇ (રદ) કરવાના નિર્ણય સામે AIMIM પ્રમુખ અને સાંસદ અસદુદ્દીન ઓવૈસીએ કેન્દ્ર સરકાર સામે આકરા પ્રહારો કર્યા છે. હૈદરાબાદમાં પત્રકારો સાથે વાતચીતમાં તેમણે સરકારની આ નીતિ તેમજ તાજેતરમાં થયેલી યુવાનોની ધરપકડ સામે ગંભીર સવાલો ઉઠાવ્યા હતા.

અસદુદ્દીન ઓવૈસીએ જણાવ્યું હતું કે, "અસલ મુદ્દો એ છે કે સરકાર કોઈના પણ વિરોધ પ્રદર્શન કરવાની આટલી વિરુદ્ધ કેમ છે? સુપ્રીમ કોર્ટે પણ શાંતિપૂર્ણ વિરોધ કરવાના નાગરિકોના અધિકારને માન્ય રાખ્યો છે. જ્યાં સુધી કોઈ પણ પ્રદર્શનમાં હિંસા ન થતી હોય ત્યાં સુધી લોકોને વિરોધ કરવાની મંજૂરી મળવી જ જોઈએ."

તાજેતરમાં થયેલી અટકાયતો અને ધરપકડો અંગે ઓવૈસીએ સવાલો ઉઠાવતા ઉમેર્યું કે, "આજે જે યુવાનોની ધરપકડ કરવામાં આવી છે, તેમની ધરપકડ કરવાની કોઈ જ જરૂર નહોતી. તેમને સરળતાથી જામીન આપી શકાતા હતા અથવા તો નોટિસ આપીને છોડી શકાતા હતા. એક યુવકને મુક્ત કરી દેવામાં આવ્યો, તો પછી બાકીના બે યુવાનોને જ્યુડિશિયલ કસ્ટડીમાં શા માટે મોકલવામાં આવ્યા?"

ઓવૈસીના આ નિવેદન બાદ જંતર-મંતર પર વિરોધ પ્રદર્શનો પર પ્રતિબંધ મૂકવા અને લોકતાંત્રિક અધિકારોના મુદ્દે રાજકીય ચર્ચા વધુ તેજ બની છે.