Delhiમાં AI સમિટમાં હોબાળો, યુથ કોંગ્રેસના પ્રમુખ ઉદય ભાનુ ચિબની ધરપકડ

દિલ્હીમાં એઆઈ સમિટ દરમિયાન ભારત મંડપમમાં યુથ કોંગ્રેસના કાર્યકરો દ્વારા કરવામાં આવેલા વિરોધ પ્રદર્શનના સંદર્ભમાં મોટી કાર્યવાહી કરવામાં આવી છે. યુથ કોંગ્રેસના રાષ્ટ્રીય પ્રમુખ ઉદય ભાનુ છિબની દિલ્હી પોલીસે ધરપકડ કરી છે.

તેમને સવારે 10 વાગ્યા પછી કોર્ટમાં રજૂ કરવામાં આવશે

તેમને સવારે 10 વાગ્યા પછી કોર્ટમાં રજૂ કરવામાં આવે તેવી અપેક્ષા છે. દિલ્હી પોલીસે સોમવારે ચિબને પૂછપરછ માટે તિલક માર્ગ પોલીસ સ્ટેશનમાં બોલાવ્યા હતા. પોલીસનો દાવો છે કે ચિબ પાસે વિરોધ પ્રદર્શન અંગેની બધી માહિતી હતી અને તેમણે વિરોધ પ્રદર્શનનું આયોજન કરવામાં મુખ્ય ભૂમિકા ભજવી હતી.

 પૂછપરછ દરમિયાન ઉદય ભાનુએ પોલીસને સહકાર આપ્યો ન હતો

પોલીસનું કહેવું છે કે પૂછપરછ દરમિયાન ઉદય ભાનુએ પોલીસને સહકાર આપ્યો ન હતો. તેણે કાં તો મોટાભાગના પ્રશ્નોનો ઇનકાર કર્યો હતો અથવા તેમને ગેરમાર્ગે દોરવાનો પ્રયાસ કર્યો હતો. પોલીસને તેની વિરુદ્ધ પૂરતા પુરાવા મળ્યા છે, જેના કારણે તેની ધરપકડ કરવામાં આવી હતી. પોલીસ હવે ચિબને કોર્ટમાં રજૂ કરશે અને તેની ભૂમિકા અંગે દલીલો રજૂ કરશે. પોલીસ સૂત્રો સૂચવે છે કે ચિબને પોલીસ રિમાન્ડ માટે વિનંતી કરવામાં આવશે.

કે સી વેણુગોપાલે તમામ આરોપીઓની છોડી મૂકવાની માંગ કરી 

કોંગ્રેસના વરિષ્ઠ નેતા કે સી વેણુગોપાલે કહ્યું છે કે, સરકાર કદાચ ભૂલી ગઈ છે કે વિરોધ પ્રદર્શન લોકશાહીનું મૂળ તત્વ છે, કોઈ ગુનો નહીં. ઈન્ડિયન યૂથ કોંગ્રેસના કાર્યકરોએ બહાદુરીથી વડાપ્રધાન મોદીનો ભ્રષ્ટાચાર ઉજાગર કર્યો. હિંસા ભડકાવ્યા વિના શાંતિપૂર્ણ વિરોધ કર્યો. અમારી માંગ છે કે તમામ આરોપીઓ પરથી તમામ કેસ રદ કરવામાં આવે અને તેમને છોડવામાં આવે. 

આ કેસમાં ગ્વાલિયરથી પણ જિતેન્દ્ર સિંહ યાદવ નામના કોંગ્રેસ કાર્યકરની ધરપકડ કરવામાં આવી છે. પોલીસનું કહેવું છે કે હજુ બીજા ત્રણથી ચાર આરોપીઓ તેમની રડાર પર છે. 

શું છે સમગ્ર મામલો 

નોંધનીય છે કે દિલ્હીના ભારત મંડપમમાં AI સમિટ યોજાઈ હતી. જેમાં વિશ્વના અનેક દેશોના પ્રતિનિધિ આવ્યા હતા. આ સમિટ દરમિયાન યૂથ કોંગ્રેસના કાર્યકરો અંદર ઘૂસ્યા અને અર્ધ નગ્ન થઈને વડાપ્રધાન મોદી વિરુદ્ધ નારાબાજી કરી હતી. જે બાદ સાત આરોપીઓની ત્યાં જ અટકાયત કરવામાં આવી હતી.