કાયદો-વ્યવસ્થા સહિતની સમસ્યાઓથી વિજય સરકાર આપમેળે પડી જશે: અન્નાદ્રમુક નેતા પલાનીસ્વામીનો મોટો દાવો

કાયદો-વ્યવસ્થા સહિતની સમસ્યાઓથી વિજય સરકાર આપમેળે પડી જશે: અન્નાદ્રમુક નેતા પલાનીસ્વામીનો મોટો દાવો
તસવીર: gstv
આ સમાચાર સાંભળો

તમિલનાડુમાં થલપતિ વિજયની આગેવાની હેઠળની ટીવીકે (TVK) સરકારને લઈને રાજકીય ગરમાવો વધ્યો છે. અન્નાદ્રમુક (AIADMK)ના મહાસચિવ અને પૂર્વ મુખ્યમંત્રી ઇડાપ્પડી કે. પલાનીસ્વામીએ મોટો દાવો કરતાં કહ્યું છે કે રાજ્યમાં બગડતી કાયદો-વ્યવસ્થાની સ્થિતિ અને અનેક સમસ્યાઓને કારણે વિજય સરકાર પોતાના જ ભારથી પડી જશે. જોકે, તેમણે સ્પષ્ટ કર્યું કે તેમની પાર્ટી પાસે સરકારને પાડવા માટે પૂરતું સંખ્યાબળ નથી.

'41 ધારાસભ્યો ધરાવતી પાર્ટી સરકાર કેવી રીતે પાડે?'

વિધાનસભામાં વિજય સરકાર વિરુદ્ધ અવિશ્વાસ પ્રસ્તાવ લાવવાની અટકળો અંગે પૂછવામાં આવતાં પલાનીસ્વામીએ કહ્યું કે અન્નાદ્રમુક પાસે માત્ર 41 ધારાસભ્યો છે. આવી સ્થિતિમાં તેમની પાર્ટી સરકારને કેવી રીતે પાડી શકે? તેમણે સરકાર પાડવાના પ્રયાસો અંગેના સમાચારોને મીડિયા દ્વારા કરવામાં આવતી અટકળો ગણાવ્યાં હતાં.

જાહેરાત

સરકાર સામે અનેક મુદ્દે આક્ષેપ

પલાનીસ્વામીએ વિજય સરકારની કામગીરી પર સવાલ ઉઠાવતાં અનેક મુદ્દાઓ ગણાવ્યા હતા. તેમના જણાવ્યા અનુસાર, રાજ્યમાં વધતી મોંઘવારી, કથળતી કાયદો-વ્યવસ્થાની સ્થિતિ અને ઔદ્યોગિક વિકાસના નબળા સંચાલનને કારણે સરકાર મુશ્કેલીમાં મુકાઈ શકે છે. તેમણે એવો પણ આક્ષેપ કર્યો કે યોગ્ય ઔદ્યોગિક નીતિના અભાવે ઉદ્યોગો તમિલનાડુ છોડીને પાડોશી રાજ્યોમાં જઈ રહ્યા છે. આ ઉપરાંત મેખેદાતુ પરિયોજના અંગે સરકાર નક્કર પગલાં લેવામાં નિષ્ફળ રહી હોવાનો પણ તેમણે દાવો કર્યો હતો. કર્ણાટક પાસેથી તમિલનાડુના હિસ્સાનું કાવેરી નદીનું પાણી મેળવવામાં સરકાર નિષ્ફળ રહી હોવાનો આરોપ પણ તેમણે લગાવ્યો હતો.

કાવેરી જળ વિવાદે રાજકીય ગરમાવો

કાવેરી નદીના પાણીનો મુદ્દો પણ તમિલનાડુમાં રાજકીય ચર્ચાના કેન્દ્રમાં છે. સુપ્રીમ કોર્ટે કર્ણાટકને કાવેરીનું 11 હજાર મિલિયન ક્યુબિક ફૂટ (TMC) પાણી છોડવાનો નિર્દેશ આપવા અંગે તમિલનાડુ સરકાર દ્વારા દાખલ કરવામાં આવેલી બે અરજીઓ ફગાવી દીધી હતી. આ નિર્ણય બાદ વિપક્ષી દ્રવિડ મુનેત્ર કઝગમ (DMK)ના અધ્યક્ષ અને પૂર્વ મુખ્યમંત્રી એમ.કે. સ્ટાલિને મુખ્યમંત્રી વિજયને ખેડૂતોના હિતમાં તાત્કાલિક પગલાં લેવા અપીલ કરી હતી. તેમણે આ મુદ્દે સર્વપક્ષીય બેઠક બોલાવવા, વિધાનસભામાં ઠરાવ પસાર કરવા અને વડાપ્રધાન નરેન્દ્ર મોદીને મળવાની માગ કરી હતી.

પાણીની અછતથી ખેડૂતોની મુશ્કેલી વધી

સ્ટાલિને સોશિયલ મીડિયા પર કરેલી પોસ્ટમાં જણાવ્યું હતું કે પાણીની અછત અને જળસ્તર ઘટવાને કારણે મેટ્ટૂર ડેમમાંથી સિંચાઈ માટે પાણી છોડવામાં આવ્યું નથી. પરિણામે ખેડૂતોની ખેતીને મોટું નુકસાન થયું છે. તેમણે ચેતવણી આપી હતી કે કાવેરીના પાણીનો યોગ્ય હિસ્સો નહીં મળવાથી બાકી રહેલા પાક પણ સુકાઈ રહ્યા છે. આ મુદ્દે મુખ્યમંત્રી વિજયની જવાબદારી નક્કી કરવાની માગ સાથે તમિલનાડુનું રાજકારણ વધુ ગરમાયું છે. જોકે, વિજય સરકાર સામે અવિશ્વાસ પ્રસ્તાવ અંગે હાલ અન્નાદ્રમુક તરફથી કોઈ સત્તાવાર પહેલની જાહેરાત કરવામાં આવી નથી.

આ સમાચાર શેર કરો

જાહેરાત