'જેટલા હિંદુઓ વિભાજિત થશે તેટલો કોંગ્રેસને ફાયદો થશે', PM મોદીએ કેમ કહ્યું આવું?

હરિયાણામાં ફરી સત્તા પ્રાપ્ત કર્યા બાદ હવે ભાજપની નજર મહારાષ્ટ્ર વિધાનસભા ચૂંટણી પર ટકેલી છે. પીએમ મોદીએ બુધવારે મહારાષ્ટ્રમાં રૂ. 7,600 કરોડથી વધુના મૂલ્યની અનેક વિકાસ યોજનાઓનો ડિજિટલ માધ્યમથી શિલાન્યાસ કર્યો હતો. આ દરમિયાન તેમણે કોંગ્રેસ પર જોરદાર નિશાન સાધતા કહ્યું કે, તેમની ફોર્મ્યુલા ભાગલા પાડો અને રાજ કરો. કોંગ્રેસના ષડયંત્રોથી સાવધાન રહેવાની જરૂર છે. કોંગ્રેસે ખેડૂતોને ઉશ્કેર્યા.

કોંગ્રેસે સમાજને તોડવાનો આરોપ લગાવ્યો

પીએમ મોદીએ કહ્યું, કોંગ્રેસ સંપૂર્ણ રીતે સાંપ્રદાયિક અને જાતિવાદી મુદ્દે ચૂંટણી લડે છે. હિંદુ સમાજમાં ભાગલા પડાવીને પોતાની જીતની ફોર્મ્યુલા બનાવવી, આ કોંગ્રેસની રાજનીતિનો આધાર છે. કોંગ્રેસ ભારતની સર્વજન હિતાય-સર્વજન સુખાયની પરંપરાને દબાવી રહી છે. સનાતન પરંપરાનું દમન કરી રહી છે.

પીએમ મોદીએ કહ્યું, "કોંગ્રેસની રાજનીતિ હિંદુઓની એક જાતિને બીજી જાતિ સામે લડાવવાની છે. કોંગ્રેસ જાણે છે કે જેટલા હિંદુઓ વિભાજિત થશે એટલો તેને ફાયદો થશે. કોંગ્રેસ કોઈપણ રીતે હિંદુ સમાજને ઝગડતા રાખીને ભારતમાં જ્યાં પણ ચૂંટણી થાય ત્યાં એ જ ફોર્મ્યુલા લાગુ કરે છે.

પીએમ મોદીએ કહ્યું, "મને દ્રઢપણે વિશ્વાસ છે કે મહારાષ્ટ્રના લોકો આજે સમાજને તોડવાના આવા દરેક ષડયંત્રને નિષ્ફળ બનાવશે. દેશના વિકાસને સર્વોપરી રાખીને મહારાષ્ટ્રની જનતાએ એક થઈને ભાજપ, મહાયુતિને સમર્થન આપવા મતદાન કરવાનું છે. 

પીએમ મોદીએ પોતાના સંબોધનમાં હરિયાણા વિધાનસભા ચૂંટણીનો પણ ઉલ્લેખ કર્યો હતો. તેમણે કહ્યું, કોંગ્રેસે યુવાનોને નિશાન બનાવ્યા અને તેમને અલગ-અલગ રીતે ભડકાવવાનો પ્રયાસ કર્યો, પરંતુ હરિયાણાના યુવાનો, બહેનો અને દીકરીઓએ તેમના ઉજ્જવળ ભવિષ્ય માટે માત્ર ભાજપ પર વિશ્વાસ કર્યો છે.