દિલ્હીમાં કોણ બનશે નવા મુખ્યમંત્રી? અરવિંદ કેજરીવાલે કર્યો ખુલાસો

દિલ્હીના મુખ્યમંત્રી અરવિંદ કેજરીવાલે રવિવારે એક મોટી જાહેરાત કરતા કહ્યું કે તેઓ બે દિવસમાં સીએમ પદ પરથી રાજીનામું આપી દેશે. આ દરમિયાન તેમણે કહ્યું કે હું ઈચ્છું છું કે દિલ્હીમાં વહેલી તકે ચૂંટણી યોજાય. મનીષ સિસોદિયા પણ મુખ્યમંત્રી નહીં બને. અન્ય કોઈ નેતા સીએમ પદ પર રહેશે. હું અને સિસોદિયા જનતાની વચ્ચે જઈશું. કેજરીવાલે કહ્યું કે આગામી સીએમ અંગેનો નિર્ણય વિધાયક દળની બેઠકમાં લેવામાં આવશે.

અરવિંદ કેજરીવાલે શું કહ્યું?

કાર્યકર્તાઓને સંબોધતા અરવિંદ કેજરીવાલે કહ્યું, 'હું આજથી બે દિવસ પછી રાજીનામું આપવા જઈ રહ્યો છું. સંબોધનમાં કહ્યું કે જ્યાં સુધી જનતા એવો ચુકાદો નહીં આપે કે  કેજરીવાલ પ્રામાણિક છે ત્યાં સુધી હું સીએમની ખુરશી પર બેસીશ નહીં. કેજરીવાલે કહ્યું, 'કેટલાક લોકો કહી રહ્યા છે કે સુપ્રીમ કોર્ટે કેટલીક શરતો લાદી છે, છેલ્લા 10 વર્ષમાં તેમણે શરતો લાદવામાં કોઈ કસર છોડી નથી. કેન્દ્ર સરકારે કાયદો બનાવીને મારું કામ રોકવાનો પ્રયાસ કર્યો.

ભાજપને ઘેરી કર્યા આકરા પ્રહાર

અરવિંદ કેજરીવાલે સંબોધનમાં ભાજપ પર આકરા પ્રહાર કર્યા હતા. તેમણે કહ્યું કે જનતાના આશીર્વાદથી અમારી પાસે ભાજપના તમામ ષડયંત્રનો સામનો કરવાની તાકાત છે. તેમણે કહ્યું કે અમે ભાજપ સામે ઝૂકીશું નહીં, રોકીશું નહીં કે વેચાઈશું નહીં. કેજરીવાલે કહ્યું કે આજે અમે દિલ્હી માટે એટલું કરી શક્યા કારણ કે અમે ઈમાનદાર છીએ. તેઓ અમારી પ્રામાણિકતાથી ડરે છે કારણ કે તે પ્રામાણિક નથી.