ગર્ભપાત કે પ્રી-ટર્મ ડિલિવરી? 7 મહિનાની ગર્ભાવસ્થા સમાપ્ત કરવા સુપ્રીમ કોર્ટની લીલી ઝંડી

નવી દિલ્હી: તાજેતરમાં સુપ્રીમ કોર્ટે એક 15 વર્ષીય સગીરાને 31 અઠવાડિયાનો ગર્ભ ગર્ભપાત કરવાની મંજૂરી આપીને એક મહત્ત્વપૂર્ણ અને ચર્ચસ્પદ ચુકાદો આપ્યો છે. કોર્ટે અવલોકન કર્યું હતું કે સગીરાને આટલી ગંભીર સ્થિતિમાં ગર્ભધારણ ચાલુ રાખવા માટે મજબૂર કરવી એ તેની ગરિમાનું ઉલ્લંઘન છે. આ કેસમાં સગીરા ભારે માનસિક તણાવમાં હતી અને તેણે આત્મહત્યાના પ્રયાસો પણ કર્યા હોવાનું નોંધાયું છે.

31 અઠવાડિયે ગર્ભપાત: માત્ર પ્રક્રિયા નહીં, પ્રી-ટર્મ ડિલિવરી

સામાન્ય રીતે 24 અઠવાડિયા પછી ગર્ભપાતની પ્રક્રિયા અત્યંત જટિલ બની જાય છે. 31 અઠવાડિયા એટલે કે સાત મહિનાનો ગર્ભ તબીબી દૃષ્ટિએ 'વાયબિલિટી' (જીવિત રહેવાની ક્ષમતા) ના તબક્કાની નજીક હોય છે. ડોક્ટરોના મતે, આ તબક્કે આ કોઈ સામાન્ય ગર્ભપાત નથી, પરંતુ તે એક પ્રકારની 'પ્રી-ટર્મ ડિલિવરી' અથવા અધૂરા માસે પ્રસૂતિ જેવી પ્રક્રિયા છે. આમાં સર્જરી અથવા લેબર ઇન્ડ્યુસ (પ્રસૂતિની પીડા ઉપાડવી) જેવી પ્રક્રિયાઓ સામેલ હોય છે.

તબીબી જોખમો અને પડકારો

કિશોરાવસ્થામાં ગર્ભાવસ્થા પોતે જ ઉચ્ચ જોખમ ધરાવે છે. 15 વર્ષની વયે શરીર સંપૂર્ણ વિકસિત હોતું નથી, જેના કારણે એનિમિયા, હાઈ બ્લડ પ્રેશર અને લેબર સંબંધિત ગંભીર સમસ્યાઓ સર્જાઈ શકે છે.

• શારીરિક જોખમ: સાત મહિનાના ગર્ભને દૂર કરવાની પ્રક્રિયામાં ભારે રક્તસ્રાવ (Bleeding) અને ચેપ (Infection) લાગવાનું જોખમ રહે છે.

• જીવિત જન્મની શક્યતા: નિષ્ણાતો જણાવે છે કે 28 અઠવાડિયા પછી ગર્ભ બહારની દુનિયામાં જીવિત રહેવાની ક્ષમતા ધરાવે છે. જો ગર્ભપાત દરમિયાન બાળક જીવિત જન્મે, તો તેને નિયોનેટલ ઇન્ટેન્સિવ કેર (NICU) ની જરૂર પડી શકે છે, જે એક અલગ નૈતિક દ્વંદ્વ ઊભું કરે છે.

માનસિક સ્વાસ્થ્યનું મહત્વ

ગાયનેકોલોજિસ્ટના જણાવ્યા અનુસાર, 15 વર્ષની છોકરી હજુ શારીરિક અને માનસિક રીતે વિકાસ કરી રહી હોય છે. અનિચ્છનીય ગર્ભાવસ્થા, ખાસ કરીને શોષણ કે દબાણના કિસ્સામાં, છોકરી પર ગંભીર માનસિક અસર કરે છે. કોર્ટે આ કિસ્સામાં સગીરાના ભવિષ્ય, શિક્ષણ અને માનસિક સ્વાસ્થ્યને સર્વોપરી રાખ્યું છે.

નૈતિક અને સામાજિક ચર્ચા

આ નિર્ણયે સોશિયલ મીડિયા અને સમાજમાં એક નવી ચર્ચા છેડી છે. કેટલાક લોકો માને છે કે સાત મહિનાના વિકસિત ગર્ભના કિસ્સામાં દત્તક વિધાન (Adoption) જેવા વિકલ્પો વિચારવા જોઈએ. જોકે, મેડિકલ બોર્ડ અને કાયદો હંમેશા માતાના શારીરિક અને માનસિક સ્વાસ્થ્યને પ્રાધાન્ય આપે છે.

આ કેસ સ્પષ્ટ કરે છે કે ગર્ભપાતનો નિર્ણય માત્ર કાયદાકીય નથી, પરંતુ તે તબીબી જટિલતાઓ, નૈતિક મૂલ્યો અને પીડિતાના મૂળભૂત અધિકારો વચ્ચેનો એક અત્યંત મુશ્કેલ સમન્વય છે.