આજથી રેલવે ટિકિટ બુકિંગના નિયમો બદલાયા, તત્કાલ ટિકિટ બુકિંગ માટે આધાર OTP જરુરી

ભારતીય રેલવેએ ટિકિટ બુકિંગના નિયમોમાં મોટો ફેરફાર કર્યો છે. આજથી, તત્કાલ ટિકિટ ઓનલાઈન બુક કરવા માટે આધાર OTP જરૂરી રહેશે. આ ઉપરાંત, એજન્ટોને બુકિંગના પહેલા 30 મિનિટ માટે એસી અને નોન-એસી બંને વર્ગો માટે ટિકિટ બુક કરવાની મંજૂરી આપવામાં આવશે નહીં, જેથી સામાન્ય મુસાફરોને પણ ટિકિટ બુક કરાવવાની તક મળે. આ ફેરફારોનો હેતુ ટિકિટ બુકિંગમાં પારદર્શિતા લાવવાનો અને એજન્ટો અથવા નકલી એજન્ટોની મનમાની રોકવાનો છે. આ નિયમો દેશમાં દરેક રેલવે ઝોનમાં લાગુ થશે.  

અહીં તત્કાલની ટિકિટ બુકિંગ માટેના નવા નિયમો સમજો

તત્કાલમાં ટિકિટ બુકિંગના નિયમો શા માટે રજૂ કરવામાં આવ્યા છે?

ઘણી વખત એવું જોવા મળ્યું છે કે તત્કાલ માટે ટિકિટ બુકિંગ શરુ થતાના અમુક ક્ષણોમાં જ બધી ટિકિટો વેંચાઈ જાય છે કારણ કે  એજન્ટો અને નકલી એજન્ટો સોફ્ટવેર અથવા ખોટી પદ્ધતિઓ દ્વારા ટિકિટ બુક કરાવતા હતા. જેના કારણે સામાન્ય મુસાફરોને ટિકિટ મેળવવામાં મુશ્કેલી પડી રહી હતી.

નવા નિયમોનો હેતુ એ છે કે ફક્ત સાચા મુસાફરોને જ ટિકિટ બુક કરવાની તક મળે અને છેતરપિંડી બંધ થાય. આધાર વેરિફિકેશન ખાતરી કરશે કે ટિકિટ તે વ્યક્તિ દ્વારા બુક કરવામાં આવી રહી છે જેનો આધાર નંબર નોંધાયેલ છે. એજન્ટોને પ્રથમ 30 મિનિટ માટે એસી અને નોન-એસી બંને વર્ગો માટે ટિકિટ બુક કરવાની મંજૂરી આપવામાં આવશે નહીં.

આધાર પ્રમાણીકરણ કેવી રીતે કાર્ય કરશે?

જો તમે IRCTC વેબસાઇટ અથવા એપ પરથી તત્કાલ ટિકિટ બુક કરાવી રહ્યા છો, તો તમારે પહેલા તમારા આધાર નંબરને તમારા IRCTC એકાઉન્ટ સાથે લિંક કરવો પડશે.

જ્યારે તમે ટિકિટ બુક કરાવવા જશો, ત્યારે તમારા રજિસ્ટર્ડ મોબાઇલ નંબર પર એક OTP મોકલવામાં આવશે. આ OTP દાખલ કર્યા પછી જ તમારું બુકિંગ કન્ફર્મ થશે. કાઉન્ટર પર પણ આ જ પ્રક્રિયા અનુસરવામાં આવશે, જ્યાં તમારે તમારો આધાર નંબર આપવો પડશે અને OTP ચકાસવો પડશે.

જો આધાર કાર્ડ ન હોય, તો શું તત્કાલ ટિકિટ બુક નહીં થાય?

હાલમાં, નવા નિયમો મુજબ, આધાર પ્રમાણીકરણ જરૂરી છે. જો તમારી પાસે આધાર કાર્ડ નથી, તો તત્કાલ ટિકિટ બુક કરવામાં મુશ્કેલી પડી શકે છે. રેલવે દ્વારા આપવામાં આવેલી માહિતીમાં આધાર વગર ટિકિટ બુક કરવાની બીજી કોઈ પદ્ધતિનો ઉલ્લેખ કરવામાં આવ્યો નથી.

કાઉન્ટર પરથી ટિકિટ બુક કરાવનારાઓ માટે કયા ફેરફારો છે?

 જો તમે રેલ્વે સ્ટેશનના કાઉન્ટર પરથી તત્કાલ ટિકિટ બુક કરાવો છો, તો 15 જુલાઈ 2025 થી, તમારે આધાર નંબર આપવો પડશે. તમારું આધાર વેરિફિકેશન કાઉન્ટર પર OTP દ્વારા કરવામાં આવશે. એટલે કે, તમારો મોબાઈલ નંબર આધાર સાથે લિંક હોવો જોઈએ, જેથી OTP આવી શકે. જો તમે કોઈ બીજા માટે ટિકિટ બુક કરાવી રહ્યા છો, તો પણ તે મુસાફરનો આધાર નંબર અને OTP જરૂરી રહેશે.

શું આ નિયમો ફક્ત તત્કાલ ટિકિટ બુકિંગ માટે જ છે?

હા, આ નિયમો ફક્ત તત્કાલ ટિકિટ બુકિંગ માટે જ છે. જનરલ ટિકિટ કે વેઇટિંગ લિસ્ટ ટિકિટ માટે આધાર ઓથેન્ટિકેશનની જરૂર નથી.