Video: મયુરભંજમાં આઝાદીના વર્ષો પછી પણ પાયાની સુવિધાઓથી વંચિત લોકો!

મયુરભંજમાં આઝાદીના વર્ષો પછી પણ પાયાની સુવિધાઓથી વંચિત લોકો!

બાળકો જીવ જોખમમાં મૂકીને ૨-૩ કિલોમીટર ચાલીને જાય છે શાળા!

બીમાર દર્દીઓને હોસ્પિટલ પહોંચાડવા માટે ખાટલાનો સહારો લેવા મજબૂર ગ્રામવાસીઓ!

ઓડિશાના મયુરભંજ જિલ્લામાંથી વિકાસના દાવાઓની પોલ ખોલતો એક અત્યંત સંવેદનશીલ અહેવાલ સામે આવ્યો છે. જિલ્લાના કપતીપદા બ્લોક હેઠળ આવતા અંતરિયાળ ટેન્ડા ગામના રહીશો આજદિન સુધી પાયાની સુવિધાઓથી વંચિત રહીને ખૂબ જ હાલાકીભર્યું જીવન જીવી રહ્યા છે. આ ગામમાં ન તો પાકા રસ્તા છે, ન વીજળીની સુવિધા છે, ન પીવા માટે શુદ્ધ પાણીની વ્યવસ્થા છે અને ન તો બાળકો માટે કોઈ શાળા ઉપલબ્ધ છે, જેના કારણે સ્થાનિક ગ્રામવાસીઓમાં ભારે રોષ અને લાચારી જોવા મળી રહી છે.સ્થાનિક ગ્રામવાસીઓએ પોતાની વેદના વ્યક્ત કરતા જણાવ્યું કે ગામમાં યોગ્ય માર્ગ ન હોવાને કારણે કોઈપણ કટોકટીની સ્થિતિમાં કે કોઈ વ્યક્તિ બીમાર પડે ત્યારે દર્દીઓને હોસ્પિટલ પહોંચાડવા માટે ખાટલામાં સૂવડાવીને કિલોમીટરો સુધી ચાલીને જવું પડે છે. આ ઉપરાંત, ગામમાં વીજળી ન હોવાને કારણે અંધકારમાં જીવન વિતાવવું પડે છે અને પીવાના પાણી માટે પણ વલખાં મારવા પડે છે. સૌથી મોટી ચિંતાનો વિષય એ છે કે ગામમાં સ્કૂલ ન હોવાને કારણે નાના બાળકોએ ભણવા માટે જંગલના જોખમી રસ્તાઓ પરથી બેથી ત્રણ કિલોમીટર ચાલીને અન્ય ગામની શાળાએ જવું પડે છે.

વીજળી, પાણી અને રસ્તા જેવી મૂળભૂત સુવિધાઓથી વંચિત ગ્રામજનો!

આ ગંભીર સમસ્યા અંગે પ્રતિક્રિયા આપતા મયુરભંજ જિલ્લા વહીવટી તંત્રના અધિકારી નેત્રાનંદ મલિકે જણાવ્યું કે તંત્રના ધ્યાને આ બાબત આવતા જ સઘન પગલાં લેવાની શરૂઆત કરવામાં આવી છે. ગ્રામીણ અને ખાસ કરીને આદિવાસી વિસ્તારોમાં પાયાની સુવિધાઓ પૂરી પાડવી એ સરકારની સર્વોચ્ચ પ્રાથમિકતા છે. વહીવટી તંત્ર દ્વારા સંબંધિત વિડિયો, તહસીલદાર અને અન્ય લાઇન ડિપાર્ટમેન્ટના અધિકારીઓ સાથે બેઠક કરીને આ હાર્ડ-ટુ-રીચ વિસ્તારોમાં રોડ, પાણી, વીજળી અને શિક્ષણ જેવી તમામ આવશ્યક સુવિધાઓ વહેલી તકે ઉપલબ્ધ કરાવવા માટેની દિશામાં કામગીરી હાથ ધરવામાં આવશે.સરકાર અને લોકપ્રતિનિધિઓ દ્વારા વિકાસના દાવાઓ ભલે મોટા પાયે કરવામાં આવતા હોય, પરંતુ ટેન્ડા ગામની આ વાસ્તવિકતા દર્શાવે છે કે હજુ પણ દેશના કેટલાક અંતરિયાળ વિસ્તારોમાં વિકાસ કિરણો પહોંચવામાં ઘણી વાર છે. ગ્રામવાસીઓ આશા લગાવીને બેઠા છે કે તંત્ર દ્વારા જલ્દીથી તેમની આ સમસ્યાઓનો કાયમી ઉકેલ લાવવામાં આવે જેથી તેમનું જીવન પણ સામાન્ય બની શકે.

બ્યૂરો રિપોર્ટ જીએસટીવી