બેંકોમાં FDના વ્યાજદરમાં વધારો, HDFC-PNB સહિત અનેક બેંકોએ દર વધાર્યા
બેન્કિંગ સિસ્ટમમાં રોકડ પ્રવાહિતા (Liquidity) ઘટતાં દેશની અનેક બેંકોએ ફિક્સ્ડ ડિપોઝિટ (Fixed Deposit-FD) પરના વ્યાજદરમાં ધારણા કરતાં ઝડપથી વધારો કરવાનું શરૂ કર્યું છે. HDFC બેંક, પંજાબ નેશનલ બેંક (PNB), કેનેરા બેંક અને બેંક ઓફ ઇન્ડિયા સહિતની બેંકોએ વિવિધ સમયગાળાની FD પર વ્યાજદર વધાર્યા છે. ખાસ કરીને ટૂંકા ગાળાની ડિપોઝિટ પર બેંકો વધુ ધ્યાન આપી રહી છે.
PNB અને કેનેરા બેંકે કેટલો વધારો કર્યો?
પંજાબ નેશનલ બેંકે 444 દિવસની FD પર વ્યાજદરમાં 10 બેસિસ પોઇન્ટ (bps) અને 680 દિવસની FD પર 50 બેસિસ પોઇન્ટનો વધારો કર્યો છે. કેનેરા બેંકે પસંદગીના સમયગાળાની FD પર 15 bpsનો વધારો કર્યો છે. હવે એક વર્ષથી 15 મહિના સુધીની FD પર 6.40%, 444 દિવસની FD પર 6.65% અને 555 દિવસની FD પર 6.75% વ્યાજ મળશે. HDFC બેંકે છ મહિના અને એક દિવસથી નવ મહિના સુધીની FD પર વ્યાજદર 15 bps વધારીને 5.65% કર્યો છે. જ્યારે નવ મહિના અને એક દિવસથી એક વર્ષ કરતાં ઓછા સમયગાળાની FD પર વ્યાજદર વધારીને 6.90% કર્યો છે. અન્ય પસંદગીના સમયગાળામાં પણ 5થી 10 bpsનો વધારો કરાયો છે.
RBIનાં પગલાંથી રોકડ પ્રવાહિતા ઘટી
ICRAના વાઇસ પ્રેસિડેન્ટ અને સેક્ટર હેડ સચિન સચદેવાના જણાવ્યા અનુસાર, શરૂઆતમાં રેપો રેટમાં વધારાની અસર FDના વ્યાજદરો પર ધીમે ધીમે થવાની ધારણા હતી. જોકે, રિઝર્વ બેંક ઓફ ઇન્ડિયા (RBI) દ્વારા બજારમાંથી વધારાની રોકડ ખેંચવાના પગલાં અને તહેવારોની મોસમમાં વધેલી માંગને કારણે બેંકોને વ્યાજદરમાં વધારો કરવાની જરૂર પડી છે. RBIએ ઓપન માર્કેટ ઓપરેશન્સ (OMO), ફોરેક્સ સ્વેપ અને કેશ રિઝર્વ રેશિયો (CRR)ની દૈનિક જાળવણી વધારવા જેવા પગલાં લીધાં છે. આ ઉપરાંત લોનની મજબૂત માંગને કારણે બેંકોને વધુ ડિપોઝિટ એકત્ર કરવાની જરૂર પડી રહી છે.
બેન્કિંગ સિસ્ટમમાં લિક્વિડિટી ઘટી
છેલ્લા બે અઠવાડિયામાં બેન્કિંગ સિસ્ટમમાં સરેરાશ વધારાની રોકડ પ્રવાહિતા ₹1.28 લાખ કરોડ રહી હતી. ઓક્ટોબરમાં આ આંકડો ₹2.39 લાખ કરોડ અને સપ્ટેમ્બરમાં ₹7.77 લાખ કરોડ હતો. આ સ્થિતિમાં RBIએ વેરિએબલ રેટ રેપો (VRR) દ્વારા બજારમાં નાણાં ઉપલબ્ધ કરાવ્યાં હતાં.
ટૂંકા ગાળાની FD પર વધુ ધ્યાન
બેંક ઓફ ઇન્ડિયાએ મર્યાદિત સમયગાળા માટે ‘BOI અક્ષય ફિક્સ્ડ ડિપોઝિટ’ યોજના શરૂ કરી છે, જેમાં વાર્ષિક 6.85% વ્યાજ આપવામાં આવે છે. બેંક ઓફ બરોડાના MD અને CEO દેબદત્ત ચાંદના જણાવ્યા અનુસાર, જો બજારમાં વ્યાજદર ઊંચા રહેશે તો બેંકે પણ પોતાની ડિપોઝિટના દરમાં ધીમે ધીમે ફેરફાર કરવો પડી શકે છે. હાલની પરિસ્થિતિમાં બેંકો લાંબા ગાળાની ઊંચી વ્યાજદરની જવાબદારી લેવાને બદલે ટૂંકા ગાળાની FD પર દર વધારવાનું પસંદ કરી રહી છે.
