Maharashtra Election: મહિલાઓને 3 હજાર રૂપિયા, સસ્તું સિલિન્ડર; MVAનો ચૂંટણી ઢંઢેરો

મલ્લિકાર્જૂન ખડગેએ કહ્યું, 'આજે અમે મહારાષ્ટ્ર ચૂંટણી માટે ઘોષણા પત્ર રજૂ કરી રહ્યા છીએ. મહારાષ્ટ્રમાં ચૂંટણી દેશ માટે ખૂબ જ મહત્ત્વપૂર્ણ ચૂંટણી છે. આ ચૂંટણી દેશનું ભવિષ્ય બદલનારી ચૂંટણી છે. જો મહારાષ્ટ્રમાં એમવીએની સરકાર લાવીશું તો એક સ્થિર અને સારૂ સુશાસન મેળવી શકીશું. મહારાષ્ટ્રની પ્રગતિ અને વિકાસના 5 સ્તંભ છે. જે ખેતી અને ગ્રામીણ વિકાસ, ઉદ્યોગ અને રોજગાર, શહેરી વિકાસ, પર્યાવરણ અને જન કલ્યાણ પર આધારિત છે.'

'યુવાનોને 4 હજાર રૂપિયા માસિક સ્ટાઇપેન્ડ આપીશું'

કોંગ્રેસ અધ્યક્ષ ખડગેએ કહ્યું, 'નોકરી ઈચ્છતા યુવાનોને 4 હજાર રૂપિયા માસિક સ્ટાઇપેન્ડ આપવામાં આવશે. 25 લાખ રૂપિયાની સ્વાસ્થ્ય વીમા યોજના રાજસ્થાનમાં અશોક ગેહલોત તરફથી શરૂ કરવામાં આવી હતી. તેને મહારાષ્ટ્રમાં પણ લાગુ કરવામાં આવશે. અમે મફત દવા ઉપલબ્ધ કરાવવાનું પણ વચન આપીએ છીએ. અમે જાતિ જનગણનાનો નિર્ણય કર્યો છે. જાતિ જનગણનાનો હેતુ લોકોમાં ભાગલા પાડવાનો નહીં, પરંતુ સમજવાનો છે કે, વિવિધ સમુદાય કઈ સ્થિતમાં છે, જેથી તેઓને લાભ મળી શકે.'

50 ટકા આરક્ષણ સીમા દૂર કરવાની તૈયારી

મહારાષ્ટ્રમાં એમવીએ ગઠબંધન તરફથી પાંચ ગેરંટી આપવામાં આવી છે. આ હેઠળ પહેલી ગેરંટીમાં મહાલક્ષ્મી યોજના દ્વારા મહિલાઓને દર મહિને 3 હજાર રૂપિયા આપવામાં આવશે. સાથે જ, તમામ મહિલાઓને મફત બસ સેવા આપવાનું પણ વચન આપવામાં આવ્યું છે. બીજી ગેરંટી સમાનતા છે. આ હેઠળ, જાતી જનગણનાની જોગવાઈ કરવામાં આવી છે. 50 ટકા આરક્ષણને દૂર કરવાની પણ વાત કરવામાં આવી છે. ત્રીજી ગેરંટીમાં કુટુંબ રક્ષા યોજના સામેલ છે, જે હેઠળ 25 લાખ રૂપિયા સ્વાસ્થ્ય વીમા અને મફત દવા આપવાનું વચન આપવામાં આવ્યું છે. કૃષિ સમૃદ્ધિ યોજના હેઠળ ખેડૂતોનું ત્રણ લાખ સુધીનું દેવું માફ કરવામાં આવશે. સમયસર ચૂકવણી કરવા પર 50 હજાર રૂપિયાની પ્રોત્સાહન રકમ પણ આપવામાં આવશે. આ સિવાય, બેરોજગારોને દર મહિને 4 હજાર રૂપિયા આપવાનું વચન આપવામાં આવ્યું છે.