અમને તો કૉકરોચ બનાવી દીધા : સુપ્રીમ કોર્ટની ટિપ્પણી પર CJP નેતા સૌરભ દાસનો આકરો પ્રહાર

સૌરભ દાસ એટલે કે કૉકરોચ જનતા પાર્ટીના ટોચના નેતાએ સુપ્રીમ કોર્ટની ટિપ્પણી પર નારાજગી વ્યક્ત કરી છે. વાસ્તવમાં, તેમણે સોમવારે હવાઈ મુસાફરીના ભાડામાં વધારા અંગે સુપ્રીમ કોર્ટ દ્વારા કરવામાં આવેલા નિવેદન સામે વાંધો ઉઠાવ્યો છે. તેમણે કહ્યું કે આ જ સિસ્ટમ છે જેના કારણે તેઓ કૉકરોચ બન્યા છે. હાલ પૂરતું, CJP દ્વારા આગામી પગલા અંગે કોઈ જાહેરાત કરવામાં આવી નથી.

સૌરભ દાસે સુપ્રીમ કોર્ટની ટિપ્પણીને લગતા પ્રકાશિત થયેલા સમાચાર શેર કર્યા છે. તેમણે લખ્યું, 'ઝેરી વાયુ પ્રદૂષણનો સામનો કરી રહ્યા છો? શ્વાસ ન લો. રસ્તાઓ પર ખાડા છે? ચાલશો નહીં. પેટ્રોલના ભાવ વધારે છે? પોતાના વાહનો ન ચલાવો. પેપર લીકનો સામનો કરી રહ્યા છો? પરીક્ષા ન આપો. મીડિયા સમાજને વહેંચી રહ્યું છે? ટીવી ન જુઓ. નકલી બાવાઓ ધર્મ સાથે રમત રમી રહ્યા છે? તેમની પાસે ન જાઓ. બેરોજગારી છે? નોકરી ન શોધો. આ એ જ સિસ્ટમ છે, જેણે આપણને કૉકરોચ બનાવી દીધા છે.'

જોકે, આ કોઈ પહેલો પ્રસંગ નથી. દાસ આ અગાઉ પણ અદાલતના નિર્ણયો સામે વાંધો ઉઠાવી ચૂક્યા છે અને કટાક્ષ કરતા રહ્યા છે. તાજેતરમાં જ તેમણે લખ્યું હતું, 'યાદ રાખો કે આપણી પાસે એવા જજો પણ છે, જેઓ સરકારના મનસ્વી અને અયોગ્ય ઉપયોગ પર લગામ લગાવવાને બદલે અને કાયદાને બદલે અંગત પૂર્વગ્રહોના આધારે નિર્ણયો આપવા અને ઉપદેશ આપવામાં માને છે. આ આપણા દેશ પર એક મોટો ડાઘ છે અને જે લોકો બંધારણનું ઉલ્લંઘન કરી રહ્યા છે, તેમણે આની કિંમત ચૂકવવી પડશે.'

સુપ્રીમ કોર્ટના નિવેદન પર કટાક્ષ

વાસ્તવમાં, તહેવારોની સિઝનને ધ્યાનમાં રાખીને વિમાન ભાડામાં 700 ટકા સુધીના વધારાનો આરોપ મૂકતી અરજી પર સુપ્રીમ કોર્ટે સોમવારે તાત્કાલિક સુનાવણી કરવાનો ઇનકાર કર્યો હતો. સુપ્રીમ કોર્ટે આ અંગે જણાવ્યું હતું કે હવાઈ મુસાફરી ન કરો. જસ્ટિસ વિક્રમ નાથ, જસ્ટિસ સંદીપ મહેતા અને જસ્ટિસ એ. સિંહની બેન્ચે વિમાન ભાડામાં થયેલા અધધધ વધારા સામે દાખલ કરવામાં આવેલી અરજી પર વિચાર કરવાનો ઇનકાર કર્યો હતો.

એડવોકેટ અભિનવે બેન્ચ સમક્ષ અરજી પર ઝડપી સુનાવણી કરવા વિનંતી કરી હતી. તેમણે જણાવ્યું હતું કે ભાડામાં 700 ટકા સુધીનો વધારો થયો છે. તેમણે દલીલ કરી હતી કે હવાઈ મુસાફરી એક આવશ્યક સેવા છે અને ભાડામાં આટલો મોટો વધારો બંધારણના અનુચ્છેદ 14નું ઉલ્લંઘન છે. જસ્ટિસ નાથે કેસને ઝડપી સુનાવણી માટે લિસ્ટ કરવાનો ઇનકાર કરતા કહ્યું કે 'હવાઈ મુસાફરી ન કરો.'

કોર્ટમાં આ અરજી વિમાન ભાડું નિયંત્રિત કરવાની માંગ સાથે અગાઉથી પેન્ડિંગ એસ. લક્ષ્મીનારાયણનની જાહેર હિતની અરજી (PIL) અંતર્ગત દાખલ કરવામાં આવી છે. તેમણે અલ્ગોરિધમ આધારિત ડાયનેમિક પ્રાઈસિંગ, અચાનક ટિકિટના દરોમાં મોટો ઉછાળો અને અન્ય વધારાના ચાર્જીસ સામે અગાઉથી જ જાહેર હિતની અરજી દાખલ કરી રાખી છે, જે હાલમાં પેન્ડિંગ છે.

ભાડામાં વધારો

સુપ્રીમ કોર્ટમાં દાખલ કરવામાં આવેલી અરજીમાં 'હિન્દુસ્તાન'માં 29 ઑક્ટોબરે પ્રકાશિત થયેલા સમાચારનો હવાલો આપતા જણાવવામાં આવ્યું છે કે દિવાળી પહેલાં ઘણા મુખ્ય સ્થાનિક (ડોમેસ્ટિક) રૂટ પર વિમાન ભાડું સામાન્ય સ્તર કરતાં 2 થી 7 ગણું વધી ગયું છે. અરજી મુજબ, દિલ્હી-કોલકાતાની ટિકિટ જે સામાન્ય રીતે 10,000 થી 11,000 રૂપિયાની હોય છે, તે 6 નવેમ્બરની મુસાફરી માટે 78,694 રૂપિયા સુધી પહોંચી ગઈ છે. અરજદારે એક જ દિવસ અને એક જ રૂટ પર ઉડતી ફ્લાઇટ્સના ભાડામાં જોવા મળતા મોટા તફાવત તરફ પણ ધ્યાન દોર્યું છે.