જ્યાં પીએમ મોદી ધ્યાન કરશે તે રોક મેમોરિયલ શા માટે છે ખાસ? વિવેકાનંદે અહીં જ જોયું હતું આ સપનું

લોકસભા ચૂંટણી 2024 ટૂંક સમયમાં પૂર્ણ થવા જઈ રહી છે. સાતમા એટલે કે છેલ્લા તબક્કા માટે 1 જૂને મતદાન થશે, જેના માટે ચૂંટણી પ્રચાર 30 મેની સાંજે સમાપ્ત થશે. આ સમગ્ર ચૂંટણી દરમિયાન વડાપ્રધાન નરેન્દ્ર મોદીએ દેશભરમાં એક પછી એક રેલીઓ કરી છે. હવે ચૂંટણી પ્રચાર પૂરો થયા બાદ પીએમ મોદી આજે એટલે કે 30 મેના રોજ તમિલનાડુના કન્યાકુમારી જિલ્લામાં પ્રખ્યાત વિવેકાનંદ રોક મેમોરિયલની મુલાકાત લેશે. આવો જાણીએ આ જગ્યા વિશે કેટલીક ખાસ વાતો.

રોક મેમોરિયલ શા માટે પ્રખ્યાત છે?

પીએમ મોદી 30 મેની સાંજથી 1 જૂનની સાંજ સુધી વિવેકાનંદ રોક મેમોરિયલના ધ્યાન મંડપમમાં ધ્યાન કરશે. એવું કહેવાય છે કે આ એ જ સ્થાન છે જ્યાં આધ્યાત્મિક નેતા વિવેકાનંદને ભારત માતા વિશેદિવ્ય દૃષ્ટિ પ્રાપ્ત થઈ હતી. પવિત્ર ગ્રંથોમાં જણાવ્યા મુજબ દેવી પાર્વતીએ આ સ્થાંતે ભગવાન શિવ માટે ધ્યાન કર્યું હતું. એવું માનવામાં આવે છે કે શિકાગોમાં વિશ્વ ધર્મ પરિષદમાં તેમના ઐતિહાસિક ભાષણ માટે જતા પહેલા વિવેકાનંદે આ ખડક પર ધ્યાન કર્યું હતું. વિવેકાનંદે અહીં ધ્યાન કરીને વિકસિત ભારતનું સપનું જોયું હતું.

ભારતનો દક્ષિણ છેડો

વિવેકાનંદ રોક મેમોરિયલને ભારતનો દક્ષિણ છેડો માનવામાં આવે છે. તે એવી જગ્યા છે જ્યાં પૂર્વ અને પશ્ચિમી દરિયાકિનારો મળે છે અને હિંદ મહાસાગર, બંગાળની ખાડી અને અરબી સમુદ્ર મળે છે. આ સ્થળે સૂર્યોદય અને સૂર્યાસ્તનો અદ્ભુત નજારો પણ જોવા મળે છે જે વિશ્વભરના પ્રવાસીઓને આકર્ષે છે.

કેવી રીતે પહોંચવું?

વિવેકાનંદ રોક મેમોરિયલ ભારતના તમિલનાડુ રાજ્યમાં કન્યાકુમારી જિલ્લાના સૌથી દક્ષિણ છેડે અને મુખ્ય ભૂમિથી 500 મીટરના અંતરે આવેલું છે. આ ખડકો લક્ષદ્વીપ સમુદ્રથી ઘેરાયેલા છે. અહીં પહોંચવા માટે નાની બોટ રાઈડની સુવિધા આપવામાં આવી છે. આ સ્થળ ભારતમાં આધ્યાત્મિક વારસાનું પ્રતિક માનવામાં આવે છે.

તેની સ્થાપના ક્યારે અને શા માટે થઈ?

વિવેકાનંદના સન્માનમાં વર્ષ 1970માં સ્વામી વિવેકાનંદ રોક મેમોરિયલની સ્થાપના કરવામાં આવી હતી. સ્મારકનું બાંધકામ પૂર્ણ કરવામાં લગભગ છ વર્ષનો સમય લાગ્યો હતો. એવું માનવામાં આવે છે કે સ્વામી વિવેકાનંદે ત્રણ દિવસ અને ત્રણ રાત સુધી આ શિલા પર ધ્યાન કર્યા પછી જ્ઞાન પ્રાપ્ત કર્યું હતું. શાંતિ અને આધ્યાત્મિક જ્ઞાન મેળવવા માટે લોકો વારંવાર આ સ્મારકની મુલાકાત લે છે.