'જો આવું નહીં થાય તો આપણે ફરીથી ગુલામ બની જઈશું' અખિલેશ સાથે પ્રેસ કોન્ફરન્સમાં ખડગેનો દાવો
ઉત્તર પ્રદેશની રાજધાની લખનૌમાં બુધવારે ઈન્ડિયા એલાયન્સની સંયુક્ત પ્રેસ કોન્ફરન્સમાં કોંગ્રેસના રાષ્ટ્રીય
ઉત્તર પ્રદેશની રાજધાની લખનૌમાં બુધવારે ઈન્ડિયા એલાયન્સની સંયુક્ત પ્રેસ કોન્ફરન્સમાં કોંગ્રેસના રાષ્ટ્રીય અધ્યક્ષ મલ્લિકાર્જુન ખડગે અને સમાજવાદી પાર્ટીના અધ્યક્ષ અખિલેશ યાદવે સંબોધન કર્યું હતું. આ દરમિયાન કોંગ્રેસ અધ્યક્ષે દેશના લોકતંત્ર અને બંધારણને બચાવવા પર ભાર મૂક્યો હતો.
કોંગ્રેસ અધ્યક્ષ ખડગેએ કહ્યું કે, મારી 53 વર્ષની કારકિર્દીમાં મેં ક્યારેય આટલી બધી પાર્ટીઓને એકસાથે ચૂંટણી લડતા જોઈ નથી. 26 પાર્ટીઓ સાથે મળીને ચૂંટણી લડી રહી છે. જરા વિચારો કે, લોકો સરકારથી કેટલા બધા નારાજ છે. આ ચૂંટણી એટલા માટે પણ મહત્વની છે કારણ કે આ એક એવી ચૂંટણી છે જે દેશનું ભવિષ્ય બચાવશે. આ ચૂંટણી આપણી ભાવિ પેઢીઓનું રક્ષણ કરવા અને આપણા અધિકારો અને સ્વતંત્રતાઓનું રક્ષણ કરવાની છે. આ ચૂંટણી સમાજના નબળા વર્ગના અનામતને બચાવવા માટેની ચૂંટણી છે. જો બંધારણ સાચવવામાં આવશે તો આ અધિકારો બચી જશે. આ આપણી ફરજ છે.
ખડગેએ કહ્યું કે આપણે બધાએ સાથે મળીને દેશનું ભવિષ્ય, લોકશાહી અને બંધારણને બચાવવું જોઈએ. જો આમ નહીં થાય તો આપણે ફરીથી ગુલામ બની જઈશું. જો લોકશાહી જ નહીં હોય, માત્ર સરમુખત્યારશાહી હશે તો ક્યાંથી તમારી વિચારધારાને મત આપશો?
તેમણે કહ્યું કે વિપક્ષી નેતાઓને ભાજપના લોકો નામાંકન ભરવાથી રોકી રહ્યા છે. અમારા પોલિંગ એજન્ટોને પણ ધમકી આપી રહ્યા છે. મેં હૈદરાબાદમાં જોયું કે, ભાજપની એક મહિલા ઉમેદવાર મુસ્લિમ મહિલાઓને બુરખો ઉઠાવીને ઓળખ કરી રહી હતી. શું આવી સ્થિતિમાં ચૂંટણી થાય? શું લોકોને ડરાવીને ચૂંટણી કરાવવામાં આવે છે? પરંતુ તેમ છતાં અમે લડી રહ્યા છીએ, એક બનીને આગળ વધી રહ્યા છીએ. અમારા રિપોર્ટ્સ બતાવે છે કે, દેશમાં થયેલા અત્યાર સુધીના 4 તબક્કાની ચૂંટણીમાં અમારું ગઠબંધન આગળ છે. અને ભાજપ પાછળ છે.
આ દરમિયાન સમાજવાદી પાર્ટીના અધ્યક્ષ અખિલેશ યાદવે કહ્યું કે, ચોથા તબક્કાની ચૂંટણી પૂરી થઈ ગઈ છે. બીજેપીના જુઠ્ઠાણાઓ જેટલા પહાડ ચઢવાના હતા તેટલા ચઢી ગયા છે અને હવે ભાંડો ફૂટી જતાં નીચે ઉતરી રહ્યા છે. ભાજપ પોતાના ખોટા દાવાઓમાં ફસાઈ ગઈ છે.
અખિલેશે કહ્યું કે, ભાજપ માટે 400નો આંકડો પાર કરવાનું તો દૂર રહ્યું, 140 સીટો માટે પણ તરસશે. દરેક લોકસભા મતવિસ્તારમાં ભાજપ 2.5 લાખ મતોથી હારી રહ્યું છે. INDIA ગઠબંધન માટે જનસમર્થન દેખાઈ રહ્યું છે, આવનારા સમયમાં 140 કરોડની જનતા તેમને 140 બેઠકો પર અટકાવી દેશે.
