રામ વિરોધીઓનો મત પડશે તો EVM અશુદ્ધ થઈ જશે; ભાજપના ધારાસભ્યનું વિવાદાસ્પદ નિવેદન

મિર્ઝાપુર નગર વિધાનસભા બેઠકના ભાજપના ધારાસભ્ય રત્નાકર મિશ્રાએ જાહેરમાં કહ્યું કે તેમને હિન્દુ હોવા પર ગર્વ છે અને તેઓ કોઈ પણ રામવિરોધી કે દેશવિરોધી વ્યક્તિનો મત લેવા માગતા નથી. તેમણે એવો દાવો પણ કર્યો કે આવા લોકોનો એક પણ મત ઇવીએમમાં પડશે તો મશીન અશુદ્ધ થઈ જશે. તેમનો આ વીડિયો સોશિયલ મીડિયા પર ફેલાતાં તેમના નિવેદનની ચર્ચા થઈ રહી છે. જોકે, આ નિવેદન કયા કાર્યક્રમમાં અને કયા સંદર્ભમાં આપવામાં આવ્યું હતું તેની વિસ્તૃત વિગતો સામે આવી નથી.

‘ભારત માતાની જય બોલનારાઓનું જ સમર્થન જોઈએ’

રત્નાકર મિશ્રાએ પોતાના નિવેદનમાં કહ્યું કે તેમને એવા લોકોના જ મત જોઈએ છે જેઓ ‘ભારત માતા કી જય’, ‘જય શ્રીરામ’ અને ‘વંદે માતરમ્’ના નારા લગાવે છે. તેમણે વધુમાં કહ્યું કે જે લોકો ભારત માતાને માનતા નથી, તેમના મતની તેમને જરૂર નથી. લઘુમતી સમુદાય અંગે વાત કરતાં ધારાસભ્યએ કહ્યું કે જો તે સમુદાયના લોકો રામભક્ત હોય અને ભારત માતાની પૂજા કરતા હોય તો જ તેઓ તેમના મત તેમને જોઇએ છે નહીતર નથી જોઇતા. આ નિવેદનમાં તેમણે મતદારોના સમર્થનને ધાર્મિક આસ્થા અને રાષ્ટ્રવાદી નારાઓ સાથે જોડ્યું છે.

દિલ્હીનાં વિરોધ પ્રદર્શનોને વિદેશી કાવતરું ગણાવ્યું

ધારાસભ્ય રત્નાકર મિશ્રાએ ભારતની ધરતી પર રહીને પાકિસ્તાનનાં ગુણગાન ગાનારા લોકોની પણ ટીકા કરી હતી. તેમણે કહ્યું કે ભારતમાં રહીને અહીંનું અન્ન ખાઈને દેશવિરોધી ગીતો ગાનારા લોકોનું સમર્થન તેમને જોઈતું નથી. આ ઉપરાંત, દિલ્હીમાં ચાલી રહેલાં વિરોધ પ્રદર્શનો અંગે તેમણે આક્ષેપ કર્યો કે તેની પાછળ વિદેશી શક્તિઓનું કાવતરું છે અને પ્રદર્શનકારીઓ વિદેશી તાકાતોના હાથમાં રમી રહ્યા છે. ધારાસભ્યના આ નિવેદન બાદ હવે સોશિયલ મીડિયા પર તેની ચર્ચા થઈ રહી છે. તેમના નિવેદન અંગે અન્ય રાજકીય પક્ષો કે સંબંધિત લોકોની પ્રતિક્રિયા સામે આવે તો આ વિવાદને લગતી વધુ વિગતો સ્પષ્ટ થઈ શકે છે.