Video: તમિલનાડુના પહાડોની રાણી ઊટીમાં પ્રવાસીઓનો ભારે ધસારો!

દિવાળીની રજાઓમાં ઊટી ધમધમ્યું

તમિલનાડુના પહાડોની રાણી ઊટીમાં પ્રવાસીઓનો ભારે ધસારો!

બોટનિકલ ગાર્ડન અને ડાડોબેટ્ટા પર સહેલાણીઓની લાગી લાંબી કતારો!

દિવાળીના પાવન પર્વ અને ત્યારબાદ મળતી રજાઓની સિઝનમાં દક્ષિણ ભારતના સૌથી લોકપ્રિય અને પહાડોની રાણી તરીકે ઓળખાતા તમિલનાડુના ઊટી ખાતે પ્રવાસીઓનો અભૂતપૂર્વ ધસારો જોવા મળી રહ્યો છે. દેશના ખૂણે-ખૂણેથી અને ખાસ કરીને પડોશી રાજ્યોમાંથી મોટી સંખ્યામાં લોકો પોતાના પરિવાર અને મિત્રો સાથે દિવાળીની રજાઓ ગાળવા માટે ઊટીની સુંદર વાદીઓમાં પહોંચી રહ્યા છે. આહલાદક વાતાવરણ અને ઠંડા પવનો વચ્ચે સમગ્ર હિલ સ્ટેશન પર હાલ ઉત્સવ અને રોનકનો અનોખો માહોલ છવાયેલો છે. ઊટીના વિશ્વપ્રસિદ્ધ ગવર્નમેન્ટ બોટનિકલ ગાર્ડન, ઊટી લેક, રોઝ ગાર્ડન અને નીલગિરી પહાડોના સૌથી ઊંચા શિખર દોડ્ડાબેટ્ટા જેવા જાણીતા પ્રવાસન સ્થળો પર સહેલાણીઓની ભારે ભીડ જોવા મળી રહી છે. બોટ હાઉસ ખાતે તળાવના શાંત પાણીમાં પેડલ અને શિકારા બોટિંગનો આનંદ માણવા માટે પ્રવાસીઓની લાંબી કતારો લાગી છે. આ ઉપરાંત નીલગિરી માઉન્ટેન રેલવે એટલે કે પરંપરાગત ટોય ટ્રેનની સફર કરવા માટે પણ લોકોમાં ભારે ક્રેઝ દેખાઈ રહ્યો છે, જે પ્રવાસીઓને અદભુત અનુભવ પૂરો પાડે છે.

દિવાળી વેકેશન માણવા ઊટી પહોંચ્યા હજારો પ્રવાસીઓ!

સહેલાણીઓની આવકથી હોટેલ અને ટૂરિઝમ ક્ષેત્રે છવાયો ઉત્સાહ!

સ્થાનિક વેપારીઓ, હોટેલ સંચાલકો અને ટેક્સી ચાલકોના જણાવ્યા મુજબ, દિવાળીની રજાઓમાં પ્રવાસીઓની આટલી મોટી સંખ્યાને કારણે સ્થાનિક પ્રવાસન ઉદ્યોગમાં ભારે ઉછાળો આવ્યો છે. હોટેલ્સ અને રિસોર્ટ્સમાં એડવાન્સ બુકિંગ થઈ ચૂક્યું છે. સહેલાણીઓએ પોતાની પ્રતિક્રિયા આપતા જણાવ્યું હતું કે શહેરી ભાગદોડ અને પ્રદૂષણથી દૂર ઊટીના કુદરતી વાતાવરણમાં દિવાળીની રજાઓ ગાળવી એ તેમના માટે અત્યંત આનંદદાયક અને યાદગાર અનુભવ બની રહ્યો છે. સ્થાનિક પ્રશાસન અને ટ્રાફિક પોલીસ દ્વારા વધતી ભીડને ધ્યાનમાં રાખીને સુરક્ષા અને ટ્રાફિક નિયંત્રણ માટે ખાસ વ્યવસ્થાઓ કરવામાં આવી છે. પ્રખ્યાત સ્થળોની આસપાસ વધારાનો પોલીસ બંદોબસ્ત ગોઠવવામાં આવ્યો છે જેથી પ્રવાસીઓને કોઈ અગવડ ન પડે. ઊટીની આ વાદીઓમાં છવાયેલી રોનક અને સહેલાણીઓનો ઉત્સાહ સાબિત કરે છે કે દિવાળી વેકેશન માણવા માટે આ પ્રાકૃતિક ધામ લોકોની પહેલી પસંદ બની રહ્યું છે.

બ્યૂરો રિપોર્ટ જીએસટીવી