ચંદ્રના ધ્રુવીય ખાડાઓમાં પાણીના બરફના પુરાવા મળ્યા: ઈસરોના વૈજ્ઞાનિકોનો ઘટસ્ફોટ

ભારતીય વૈજ્ઞાનિકોએ ચંદ્ર પર સફળ લેંડિંગ કરાવી ઈતિહાસમાં પોતાનું નામ નોધાવ્યું હતું, હવે ફરી એકવાર ચંદ્ર પર સંશોધન માટે ભારતનો ધ્વજ લહેરાવ્યો છે. ભારતના ચંદ્રયાન 3 મિશનની સફળતા પછી, ચંદ્ર પર સંશોધન માત્ર ભારતમાં જ નહીં પરંતુ સમગ્ર વિશ્વમાં ચાલી રહ્યું છે. આ શ્રેણીમાં ભારતને વધુ એક સફળતા મળી છે. ઈસરોના વૈજ્ઞાનિકોના અભ્યાસમાં જાણવા મળ્યું છે કે ચંદ્રના ધ્રુવીય ક્રેટર્સમાં(ખાડાઓમાં) મોટા પ્રમાણમાં પાણીનો બરફ હોવાની સંભાવના છે.

બંને ધ્રુવોની સપાટી પર અનેક ગણો વધુ બરફ

ઈસરોના સ્પેસ એપ્લિકેશન સેન્ટરના વૈજ્ઞાનિકોએ IIT કાનપુર, યુનિવર્સિટી ઓફ સાઉથ કેલિફોર્નિયા, જેટ પ્રોપલ્શન લેબ અને IIT (ISM)ના સંશોધકોની મદદથી આ અભ્યાસ હાથ ધર્યો છે. ઈસરોના વૈજ્ઞાનિકોએ જણાવ્યું હતું કે પ્રથમ થોડા મીટર સુધી ઉપરની સપાટી પર બરફનું પ્રમાણ બંને ધ્રુવોની સપાટી પર હાજર બરફના જથ્થા કરતાં લગભગ 5 થી 8 ગણું વધારે છે.

બરફના નમૂના લેવા માટે ચંદ્ર પર ડ્રિલિંગ કરવું પડશે

ઈસરોના વૈજ્ઞાનિકોનું કહેવું છે કે બરફના સેમ્પલ એકત્રિત કરવા માટે ભવિષ્યમાં ચંદ્ર પર ડ્રિલિંગ કરવાની જરૂર પડી શકે છે. જોકે આ એક લાંબા ગાળાનું મિશન હશે. સંશોધન મુજબ ઉત્તર ધ્રુવમાં બરફનું પ્રમાણ દક્ષિણ ધ્રુવ કરતા બમણું છે.

અહીં બરફ કેવી રીતે બને છે

ચંદ્રના ધ્રુવીય ક્રેટર્સમાં બરફની હાજરી વિશે વૈજ્ઞાનિકો દ્વારા ખુલાસો કર્યા પછી, ઘણા પ્રશ્નો ઉભા થઈ રહ્યા છે જેના જવાબો સંશોધનમાં વૈજ્ઞાનિકો શોધી રહ્યા છે. હાલમાં, ચંદ્ર પર બરફ કેવી રીતે બને છે તેના પર વૈજ્ઞાનિકોના સંશોધનમાં જાણવા મળ્યું છે કે ચંદ્રના  ધ્રુવોમાં પાણીના બરફનો મુખ્ય સ્ત્રોત ઇમ્બ્રિયન સમયગાળા દરમિયાન જ્વાળામુખી દરમિયાન છોડવામાં આવતો ગેસ છે. ચંદ્ર પર પાણીનો બરફ અને તેના ફેલાવાને સમજવા માટે, ISRO ટીમે રેકોનિસન્સ ઓર્બિટર પર રડાર, લેસર, ઓપ્ટિકલ, ન્યુટ્રોન સ્પેક્ટ્રોમીટર, અલ્ટ્રાવાયોલેટ સ્પેક્ટ્રોમીટર અને થર્મલ રેડિયોમીટર સહિતના સાત સાધનોનો ઉપયોગ કર્યો છે.

ચંદ્ર પર પાણીની શોધ ખૂબ જ મહત્ત્વપૂર્ણ છે

ચંદ્ર ધ્રુવોમાં પાણીના બરફની આ શોધ અત્યંત મહત્ત્વપૂર્ણ છે કારણ કે તે ચંદ્ર પર ભાવિ જીવનની શક્યતા નક્કી કરવામાં મદદ કરે છે તેમજ ISROની ભવિષ્યમાં લેન્ડિંગ અને સેમ્પલિંગ સાઇટ્સ પસંદ કરવામાં મદદ કરે છે આ અભ્યાસના તારણો ISROના અગાઉના અભ્યાસ પર આધારિત છે, જેમાં ચંદ્રયાન-2 એ ધ્રુવીય ક્રેટર્સમાં પાણીના બરફની હાજરીની શક્યતા તરફ ધ્યાન દોર્યું હતું. ,