"બંધારણ બદલવાનો પ્રયાસ સફળ નહીં થવા દઈએ": કટોકટી અને 42મા સુધારાને યાદ કરી ફડણવીસે ઉદ્ધવ-કોંગ્રેસનો લીધો ઉધડો!

કોંગ્રેસ સહિત વિપક્ષી ગઠબંધનના નેતાઓ દ્વારા દેશમાં ‘રેઝિમ ચેન્જ’ (શાસન/વ્યવસ્થા પરિવર્તન) અંગે કરવામાં આવી રહેલા નિવેદનો પર ભાજપના વરિષ્ઠ નેતા અને મહારાષ્ટ્રના મુખ્યમંત્રી દેવેન્દ્ર ફડણવીસે જડબાતોડ જવાબ આપ્યો છે. ફડણવીસે વિરોધ પક્ષો પર દેશના બંધારણ અને લોકશાહી મૂલ્યો સાથે ગંભીર ખિલવાડ કરવાનો આરોપ લગાવતાં સ્પષ્ટ કર્યું છે કે, ભાજપના કાર્યકરો લોકશાહી અને બાબાસાહેબના બંધારણના રક્ષણ માટે રસ્તા પર ઊતરી ચૂક્યા છે અને વિપક્ષના મનસૂબા ક્યારેય સફળ થવા દેવામાં નહીં આવે.

‘રેઝિમ ચેન્જ’નો અસલી અર્થ શું?

મુખ્યમંત્રીએ આકરા શબ્દોમાં જણાવ્યું કે, "રેઝિમ ચેન્જનો સીધો મતલબ માત્ર સરકાર બદલવી એટલો નથી, પરંતુ દેશની આખી વ્યવસ્થા અને બંધારણને બદલવાનો પ્રયાસ છે." તેમણે ઉદ્ધવ ઠાકરેના નિવેદન પર કટાક્ષ કરતાં કહ્યું કે, "મને નથી ખબર કે ઉદ્ધવ ઠાકરેને રેઝિમ ચેન્જનો વાસ્તવિક અર્થ સમજાય છે કે નહીં, પરંતુ તેઓ પણ સિસ્ટમ અને વ્યવસ્થા બદલવાની વાતો કરી રહ્યા છે."

૧૯૭૫ની કટોકટી અને ૪૨મા સુધારાનો ઉલ્લેખ

કોંગ્રેસના ઈતિહાસ પર પ્રહાર કરતાં ફડણવીસે ૧૯૭૫ની ઇમરજન્સીની યાદ અપાવી હતી. તેમણે કહ્યું કે, તે સમયે ઇન્દિરા ગાંધીએ સુપ્રીમ કોર્ટના નિર્ણય બાદ દેશની આખી લોકતાંત્રિક વ્યવસ્થાને કચડી નાખવાનો પ્રયાસ કર્યો હતો અને ૧૯૭૬માં ૪૨મો બંધારણીય સુધારો લાવીને નાગરિકોના મૂળભૂત અધિકારોને સીમિત કરી દીધા હતા. બાદમાં ૧૯૭૭માં મોરારજી દેસાઈ અને અટલ બિહારી વાજપેયીની સરકારે ફરી બંધારણમાં સુધારો કરીને પરિસ્થિતિ થાળે પાડી હતી. રાહુલ ગાંધી પર પ્રહાર કરતા તેમણે કટાક્ષ કર્યો કે, "હવે ઇન્દિરા ગાંધીના પૌત્ર પણ એ જ રસ્તે ચાલી રહ્યા છે—બોટલ નવી છે, પરંતુ અંદર રહેલો દારૂ એ જ જૂનો છે."

લાલ રંગના પુસ્તક (લાલ કિતાબ) પર ગંભીર આક્ષેપ

વિપક્ષી નેતાઓ દ્વારા જાહેરમાં પ્રદર્શિત કરવામાં આવતા લાલ રંગના બંધારણના પુસ્તક પર સવાલ ઉઠાવતાં ફડણવીસે જણાવ્યું કે, "અમે હંમેશાં વાદળી રંગના પૂંઠાવાળું બંધારણ જોયું છે, પરંતુ હવે વિપક્ષના નેતાઓ લાલ કિતાબ લઈને ફરી રહ્યા છે." તેમણે દાવો કર્યો કે ભૂતકાળમાં નેપાળ, શ્રીલંકા અને બાંગ્લાદેશમાં અરાજકતા ફેલાવીને સત્તા પરિવર્તન કરવા માટે પણ આ જ પ્રકારના પ્રતીકો અને પદ્ધતિઓનો ઉપયોગ કરવામાં આવ્યો હતો.

ન્યાયપાલિકાનું અપમાન બંધ થવું જોઈએ

ફડણવીસે છેલ્લે ઉમેર્યું કે, વિપક્ષ એક તરફ બંધારણની વાતો કરે છે અને બીજી તરફ બંધારણીય સંસ્થાઓને બદનામ કરે છે. સુપ્રીમ કોર્ટ સામે કરવામાં આવતા વિરોધ પ્રદર્શનો પર નિશાન સાધતા તેમણે કહ્યું કે અદાલતો કોઈ પક્ષના નફા-નુકસાનને જોઈને નહીં પરંતુ દેશના કાયદાના આધારે ચુકાદા આપે છે, અને કોર્ટ સામે દેખાવો કરીને વિપક્ષ ન્યાયતંત્રની ગરિમાને ઠેસ પહોંચાડી રહ્યો છે.