Video: ૧૦૦થી વધુ યુવા એથ્લીટ્સની ભાગીદારીથી કાશ્મીરમાં વૉટર સ્પોર્ટ્સને મળી નવી ઊંચાઈ!

શ્રીનગરમાં ડિસ્ટ્રિક્ટ રોઇંગ ચેમ્પિયનશિપમાં યુવાનોએ બતાવ્યો દમ!

૧૦૦થી વધુ યુવા એથ્લીટ્સની ભાગીદારીથી કાશ્મીરમાં વૉટર સ્પોર્ટ્સને મળી નવી ઊંચાઈ!

જમ્મુ-કાશ્મીરના યુવાનોને ઓલિમ્પિક પોડિયમ સુધી પહોંચાડવાનું સપનું થઈ રહ્યું છે સાકાર!

જમ્મુ અને કાશ્મીરના શ્રીનગરથી યુવા ઉત્સાહ, ખેલદિલી અને વૉટર સ્પોર્ટ્સ ક્ષેત્રે એક અત્યંત પ્રેરણાદાયી અહેવાલ સામે આવ્યો છે. શ્રીનગરના રમણીય પોખરીબાલ વૉટર સ્પોર્ટ્સ ક્લબ ખાતે ૮મી ડિસ્ટ્રિક્ટ શ્રિનગર ઇન્ડોર રોઇંગ અને કયાકિંગ-કેનોઇંગ ચેમ્પિયનશિપનું આયોજન કરવામાં આવ્યું હતું. આ સ્પર્ધાનો મુખ્ય હેતુ યુવાનોમાં વૉટર સ્પોર્ટ્સ પ્રત્યે રુચિ વધારવાનો અને ગ્રામીણ તથા જિલ્લા સ્તરેથી છુપાયેલી પ્રતિભાઓને બહાર લાવવાનો છે. આ સ્પર્ધામાં બારામુલ્લા, ગાંદરબલ અને બાંદીપોરા સહિત વિવિધ જિલ્લાઓમાંથી ૧૦૦ કરતાં વધુ ઉત્સાહી યુવા એથ્લીટ્સ અને ખેલાડીઓએ ભાગ લીધો હતો. આયોજક અને જાણીતા કોચ બિલકીસ મીરના માર્ગદર્શન હેઠળ આયોજિત આ ઇવેન્ટમાં સિંગલ, ડબલ અને ફોર કેટેગરીની બોટ રેસ યોજાઈ હતી. ખેલાડીઓએ જણાવ્યું કે આ પ્રકારની સ્પર્ધાઓથી તેમને માત્ર સ્પર્ધાત્મક અનુભવ જ નથી મળતો, પરંતુ રાષ્ટ્રીય અને આંતરરાષ્ટ્રીય સ્તરે તૈયારી કરવા માટેનો વિશ્વાસ પણ વધે છે. તાજેતરમાં જ સ્પોર્ટ્સ કોટા હેઠળ અસંખ્ય મેડલ વિજેતા યુવાનોને સરકારી નોકરીઓ મળવાથી ખેલાડીઓમાં ભારે ઉત્સાહ જોવા મળી રહ્યો છે અને યુવાનો હવે વૉટર સ્પોર્ટ્સને એક કરિયર તરીકે અપનાવી રહ્યા છે..

આ પ્રસંગે ઉપસ્થિત અગ્રણીઓ અને ખેલાડીઓએ પોતાના અનુભવો શેર કરતા જણાવ્યું કે જમ્મુ અને કાશ્મીરમાં પ્રતિભાની કોઈ જ કમી નથી, માત્ર યોગ્ય તાલીમ, સાયન્ટિફિક ઇનપુટ્સ અને આધુનિક સાધનોની આવશ્યકતા છે. વહીવટી તંત્ર અને સ્પોર્ટ્સ ઓથોરિટીના સહયોગથી કાશ્મીરના યુવાનો આગામી એશિયન ગેમ્સ અને ઓલિમ્પિકસમાં દેશ માટે મેડલ જીતીને વૈશ્વિક સ્તરે રાજ્યનું નામ રોશન કરવા માટે સજ્જ થઈ રહ્યા છે. છોકરીઓ પણ મોટી સંખ્યામાં આ સાહસિક રમતોમાં ભાગ લઈ રહી છે, જે મહિલા સશક્તિકરણનું ઉત્તમ ઉદાહરણ પૂરું પાડે છે. શ્રીનગરની આ ચેમ્પિયનશિપે સાબિત કરી દીધું છે કે કાશ્મીર હવે માત્ર પર્યટન જ નહીં, પરંતુ સાહસિક રમતો અને સ્પોર્ટ્સ હબ તરીકે પણ ઝડપથી વિકસી રહ્યું છે. સ્થાનિક સ્તરે રમાતી આવી સ્પર્ધાઓ ભવિષ્યના ઓલિમ્પિક ચેમ્પિયન્સ તૈયાર કરવામાં પાયાનો પથ્થર સાબિત થશે.

બ્યૂરો રિપોર્ટ જીએસટીવી