કલકત્તા હાઈકોર્ટ મમતા સરકારની 2016ની સ્કૂલ ભર્તી રદ કરી, 25 હજાર શિક્ષકોની નોકરી ગઈઃ 6 અઠવાડિયામાં પગાર પાછો આપવા આદેશ
લોકસભા ચૂંટણી વચ્ચે કલકત્તા હાઈકોર્ટે પશ્ચિમ બંગાળના મુખ્યમંત્રી મમતા બેનર્જીની સરકારને
લોકસભા ચૂંટણી વચ્ચે કલકત્તા હાઈકોર્ટે પશ્ચિમ બંગાળના મુખ્યમંત્રી મમતા બેનર્જીની સરકારને સોમવારે મોટો ઝટકો આપ્યો છે. કોર્ટે સરકાર દ્વારા પ્રાયોજિત અને સહાયતા પ્રાપ્ત શાળાઓમાં 2016 રાજ્ય-સ્તરની કસોટી થકી ભરતી કરાયેલા શૈક્ષણિક અને બિન-શૈક્ષણિક કર્મચારીઓની તમામ નિમણૂંકો રદ કરી દીધી છે. કલકત્તા હાઈકોર્ટના આ નિર્ણયને કારણે રાજ્યમાં 25 હજારથી વધુ શિક્ષકોએ તેમની નોકરી ગુમાવી છે.
હકિકતમાં પશ્ચિમ બંગાળમાં 2016માં યોજાયેલી સ્કૂલ ભર્તીમાં અનિયમિતતા જોવા મળી હતી. આ પછી અરજીઓ અને અપીલ દાખલ કરી કોર્ટનો દરવાજો ખટખટાવ્યો હતો. શાળા ભરતી કૌભાંડની તપાસ કરી રહેલી સીબીઆઈએ રાજ્યના પૂર્વ શિક્ષણ મંત્રી પાર્થ ચેટર્જી અને પશ્ચિમ બંગાળ શાળા સેવા આયોગ (એસએસસી)માં હોદ્દા ધરાવતા કેટલાક અધિકારીઓની પણ ધરપકડ કરી હતી. આ સાથે જ કોર્ટે સેન્ટ્રલ બ્યુરો ઓફ ઈન્વેસ્ટિગેશન (CBI)ને શાળા ભરતી કૌભાંડની તપાસ કરવાનો આદેશ પણ આપ્યો છે.
બંગાળમાં એક સાથે 25000 શિક્ષકોએ તેમની નોકરી ગુમાવી
કલકત્તા હાઈકોર્ટના જસ્ટિસ દેબાંગસુ બસાક અને જસ્ટિસ મોહમ્મદ શબ્બર રશીદીની બનેલી ડિવિઝન બેન્ચે શાળામાં નોકરીઓ માટેની ભરતી પ્રક્રિયાને રદ કરવાનો ચુકાદો આપ્યો હતો. કોર્ટના આ નિર્ણયથી રાજ્યમાં 25,753 શિક્ષકોએ તેમની નોકરી ગુમાવી છે. જો કે કોર્ટે મમતા સરકારને તમામ ટીચિંગ અને નોન-ટીચિંગ સ્ટાફનો પગાર છ સપ્તાહમાં પરત કરવાનો આદેશ આપ્યો છે.
શું છે શાળા ભરતી કૌભાંડ?
પશ્ચિમ બંગાળમાં મમતા સરકારે 2016માં શાળાઓમાં શિક્ષકો અને નોન-ટીચિંગ સ્ટાફની ભરતી કરી હતી. આ ભરતી દ્વારા માધ્યમિક અને ઉચ્ચતર માધ્યમિક શાળાઓ માટે શિક્ષકોની પસંદગી કરવાની હતી. શાળાઓમાં નોન-ટીચિંગ સ્ટાફ માટે ગ્રુપ સી અને ગ્રુપ ડી કેટેગરી હેઠળ યુવાનોની ભરતી કરવામાં આવી રહી હતી. જોકે, ભરતી માટે લેવાયેલી કસોટીમાં ઉમેદવારો દ્વારા સબમિટ કરાયેલી OMR શીટમાં ગેરરીતિ હોવાનો આક્ષેપ કરાયો હતો.
ભરતી પ્રક્રિયામાં અનિયમિતતાનો મામલો ફરી કલકત્તા હાઈકોર્ટમાં પહોંચ્યો હતો. આ સંદર્ભે કોર્ટમાં અનેક અરજીઓ દાખલ કરવામાં આવી હતી, જેમાં ભરતી પ્રક્રિયાની તપાસની માંગ કરવામાં આવી હતી. કોર્ટે આ તમામ અરજીઓ એકસાથે સાંભળી હતી. હાઈકોર્ટે પણ સીબીઆઈને ભરતી કૌભાંડની તપાસ કરવાનો આદેશ આપ્યો હતો. આ પછી, તપાસ એજન્સીએ બે મહિનામાં પોતાનો તપાસ રિપોર્ટ કોર્ટમાં રજૂ કર્યો. રિપોર્ટ મળ્યા બાદ 20 માર્ચે સુનાવણી પૂર્ણ થઈ હતી અને આજે નિર્ણય લેવામાં આવ્યો છે.
