કોંગ્રેસનો ઉદ્ધવ ઠાકરે અને શરદ પવારને મોટો ઝટકો, BMCની ચૂંટણી કોંગ્રેસ એકલા હાથે લડશે

મહારાષ્ટ્રના રાજકારણમાં ગરમાવો જોવા મળી રહ્યો છે. રાજ્યમાં બૃહદ મુંબઈ મ્યુનિસિપલ કોર્પોરેશન (BMC)ની ચૂંટણીની તારીખ જાહેર થાય તે પહેલા કોંગ્રેસે મોટી જાહેરાત કરી દીધી છે. કોંગ્રેસે ઉદ્ધવ ઠાકરે અને શરદ પવારને મોટો ઝટકો આપ્યો છે. કોંગ્રેસ નેતા વિજય વડેટ્ટીવારે જાહેરાત કરી દીધી છે કે, BMCની ચૂંટણી કોંગ્રેસ એકલા હાથે લડશે.

હાઈકમાન્ડે મંજૂરી આપ્યા બાદ લેવાયો નિર્ણય

કોંગ્રેસ નેતા વિજય વડેટ્ટીવારે નાગપુરમાં સત્તાવાર કહ્યું છે કે, ‘અમારા સ્થાનિક નેતાઓએ અમારી પાર્ટીને એકલા આગળ વધવાની વિનંતી કરી છે. આ અંગે મેં હાઈકમાન્ડને વાત કરી હતી, તો હાઈકમાન્ડે અમને કહ્યું છે કે, સ્થાનિક પરિસ્થિતિને ધ્યાને રાખીને નિર્ણય લેવામાં આવે. મુંબઈ કોંગ્રેસમાં નિર્ણય લેવામાં આવ્યો છે કે, એકલા હાથે ચૂંટણી લડવામાં આવે.’

X પર જુઓ

કોંગ્રેસના આ નિર્ણયે ગઠબંધનની વધારી ચિંતા

કોંગ્રેસે BMCની ચૂંટણી એકલા હાથે લડવાનો નિર્ણય કરીને મહાવિકાસ આઘાડી (MVA) ગઠબંધનની ચિંતા વધારી દીધી છે. આ ગઠબંધનમાં કોંગ્રેસની સાથે ઉદ્ધવ ઠાકરેની શિવસેના યુબીટી અને શરદ પવારની એનસીપી એસપી પાર્ટી સામેલ છે. ઉલ્લેખનીય છે કે, BMCની ચૂંટણીની તારીખો હજુ જાહેર કરવામાં આવી નથી, તે પહેલા જ રાજ્યના રાજકારણમાં ઉથલપાથલ જોવા મળી રહી છે.

કોંગ્રેસ તરફથી 1150 ઉમેદવારોને ચૂંટણી લડવાની ઈચ્છા

કોંગ્રેસના મુંબઈ એકમે 6 નવેમ્બરે 'X' પર પોસ્ટ કરીને માહિતી આપી હતી કે, કોંગ્રેસે BMC ચૂંટણીમાં લડવાની ઈચ્છા ધરાવતા ઉમેદવારોને અરજી કરવા કહ્યું હતું, જેમાં 1150થી વધુ અરજી આવી છે. મુંબઈ કોંગ્રેસ અધ્યક્ષ અને સાંસદ વર્ષા ગાયકવાડે ચૂંટણીની તૈયારીઓ શરૂ કરી દીધી છે. આ માટે 227 વોર્ડ માટે પ્રભારીની નિમણુંક કરી દેવાઈ છે. સાંસદ સુરેશચંદ્ર રાજહંસે કહ્યું છે કે, વર્ષા ગાયકવાડની આગેવાની હેઠળ તમામ નેતા, પદાધિકારીઓ અને કાર્યકર્તાઓ ચૂંટણીની તૈયારીમાં વ્યસ્ત છે.