બજેટ સત્ર પહેલા આજે સર્વપક્ષીય બેઠક, TMC હાજરી નહીં આપે

કેન્દ્ર સરકારે સંસદના બજેટ સત્ર પહેલા આજે એટલે કે રવિવારે સર્વપક્ષીય બેઠક બોલાવી છે. બેઠક દરમિયાન, સરકાર સંસદના બંને ગૃહોની સુચારૂ કામગીરી માટે તમામ વિપક્ષી પક્ષો પાસેથી સહકારની વિનંતી કરશે. સવારે 11.00 કલાકે સર્વપક્ષીય બેઠક યોજાશે. વિપક્ષના નેતા રાહુલ ગાંધી પણ સર્વપક્ષીય બેઠકમાં હાજરી આપશે. સંસદીય કાર્ય મંત્રી કિરેન રિજિજુ પણ હાજર રહેશે. ટીએમસી આ બેઠકમાં ભાગ લેશે નહીં.

 આ સત્રમાં છ બિલ થશે રજૂ 

બજેટ સત્ર સોમવારથી શરૂ થશે અને આવતા મહિનાની 12 તારીખ સુધી ચાલશે. આ સમયગાળા દરમિયાન 19 બેઠકો થશે. સરકાર આ સત્રમાં છ બિલ રજૂ કરે તેવી અપેક્ષા છે, જેમાં 90 વર્ષ જૂના એરક્રાફ્ટ એક્ટને બદલવાનું બિલ પણ સામેલ છે. આ સત્રમાં જમ્મુ-કાશ્મીરના બજેટને પણ સંસદની મંજૂરી મળશે. હાલમાં, અહીં વિધાનસભા અસ્તિત્વમાં નથી અને તેના પર કેન્દ્રનું શાસન છે.

સામાન્ય બજેટ 23 જુલાઈએ રજૂ 

નાણામંત્રી નિર્મલા સીતારમણ 23 જુલાઈએ સામાન્ય બજેટ રજૂ કરશે. આ પહેલા આવતીકાલે એટલે કે સોમવારે તે સંસદમાં આર્થિક સર્વે પણ રજૂ કરશે. સંસદીય બાબતોના પ્રધાન કિરેન રિજિજુએ 21 જુલાઈએ તમામ રાજકીય પક્ષો બજેટ સત્ર દરમિયાન જે મુદ્દા ઉઠાવવા માંગે છે તે સમજવા માટે સર્વપક્ષીય બેઠક બોલાવી છે. આ સત્ર દરમિયાન વિપક્ષ NEET પેપર લીક અને રેલ સુરક્ષા જેવા મુદ્દા ઉઠાવી શકે છે.

બજેટ સત્રમાં છ નવા બિલ રજૂ કરાશે

સત્ર દરમિયાન રજૂ અને પસાર કરવામાં આવનાર બિલોમાં ફાઇનાન્સ બિલ, ડિઝાસ્ટર મેનેજમેન્ટ, બોઇલર્સ બિલ, ઇન્ડિયન એરક્રાફ્ટ બિલ 2024, કોફી પ્રમોશન એન્ડ ડેવલપમેન્ટ બિલ અને રબર પ્રમોશન એન્ડ ડેવલપમેન્ટ બિલનો સમાવેશ થાય છે. આ સિવાય બજેટ રજૂ અને ચર્ચા કરવામાં આવશે. આ સત્રમાં વિનિયોગ બિલ પસાર કરવામાં આવશે. આ બધા સિવાય જમ્મુ-કાશ્મીરના બજેટ પર ચર્ચા થશે, ત્યારબાદ તેને પસાર કરવામાં આવશે.

બીજેડી વિશેષ દરજ્જાની માંગ કરશે

ઓડિશાના ભૂતપૂર્વ મુખ્ય પ્રધાન નવીન પટનાયકની આગેવાની હેઠળના બીજુ જનતા દળે જાહેરાત કરી છે કે તે મજબૂત વિપક્ષની ભૂમિકા ભજવશે અને સંસદમાં રાજ્યના હિતના મુદ્દાઓને આક્રમક રીતે ઉઠાવશે. BJD સંસદીય દળના અધ્યક્ષ તરીકે ચૂંટાયેલા પટનાયકે તેમની પાર્ટીના સાંસદોને ઓડિશાને વિશેષ દરજ્જો આપવાની માંગ ઉઠાવવા કહ્યું છે.