આંધ્રપ્રદેશના માછીમારે 1500 કિલોની માછલી, ક્રેન વડે ઉપાડીને બજારમાં લઈ જવાઈ

આંધ્રપ્રદેશના માછલીપટ્ટનમમાં એક માછીમારે આશરે 1500 કિલોની એક માછલી પકડી હતી. આ એક વિશાળ વ્હેલ શાર્ક હતી. જેનું વજન 1500 કિલોગ્રામ હોવાનું કહેવાય છે, તે સ્થાનિક માછીમારોની જાળમાં ફસાઈ ગઈ હતી. આ વિશાળ માછલીને ક્રેનની મદદથી ગિલકાલાદિંડી બંદરે લાવવામાં આવી હતી.

મળતી માહિતી મુજબ, માછલીપટ્ટનમના કૃષ્ણા જિલ્લામાં સ્થાનિક માછીમારોની જાળમાં 1,500 કિલો વજનની વિશાળ વ્હેલ શાર્ક ફસાઈ ગઈ હતી. જાળમાં ફસાયેલી આ વિશાળ માછલીને ક્રેનની મદદથી ગિલકાલાદિંડી બંદરના કિનારે લાવવામાં આવી હતી, જેને ચેન્નાઈના વેપારીઓએ તરત જ ખરીદી લીધી હતી.

આ વ્હેલ શાર્ક (Rhincodon typus) એક લુપ્તપ્રાય પ્રજાતિ છે જે તેની ધીમી ગતિ અને મોટા કદ માટે જાણીતી છે. આંતરરાષ્ટ્રીય વ્હેલ શાર્ક દિવસ દર વર્ષે 30 ઓગસ્ટના રોજ વિશ્વભરમાં ઉજવવામાં આવે છે. વ્હેલ શાર્ક ફિલ્ટર-ફીડિંગ માછલીની ધીમી ગતિએ ચાલતી પ્રજાતિ છે. વ્હેલ શાર્ક મહાસાગરોના ખુલ્લા પાણીમાં રહે છે. ગુજરાતના દરિયા કિનારાનું તાપમાન તેમના માટે અનુકૂળ છે, જેના કારણે વ્હેલ શાર્ક ગુજરાતના દરિયાકાંઠે ઈંડા મૂકવા આવે છે, તેથી વ્હેલ શાર્કને ગુજરાતની દીકરી પણ કહેવામાં આવે છે.

વ્હેલ શાર્કને વિશ્વની માછલીઓની સૌથી મોટી પ્રજાતિ છે

વર્ષ 2000 અને તે પહેલાં, ગુજરાત રાજ્યના દરિયાકાંઠે ઘણી વ્હેલ શાર્કનો શિકાર કરવામાં આવ્યો હતો. 2004માં પ્રખ્યાત કથાકાર મોરારીબાપુએ આ ગેરકાયદેસર શિકારને રોકવા માટે વ્હેલના સંરક્ષણ માટે હાકલ કરી હતી. વ્હેલ શાર્કને વિશ્વની માછલીઓની સૌથી મોટી પ્રજાતિ માનવામાં આવે છે. આ જળચર પ્રાણીનું વજન 10 થી 12 ટન અને લંબાઈ 40 થી 50 ફૂટ છે. જો તેનો શિકાર ન કરવામાં આવે તો તેનું આયુષ્ય 100 વર્ષ સુધીનું છે. 11 જુલાઈ, 2001ના રોજ, ભારત સરકારના પર્યાવરણ અને વન મંત્રાલયે વ્હેલ શાર્કને કાનૂની રક્ષણ આપ્યું અને શિકાર પર પ્રતિબંધ મૂક્યો. તેને વાઇલ્ડલાઇફ પ્રોટેક્શન એક્ટ 1972ની સૂચિ 1માં સામેલ કરવામાં આવ્યું હતું. તેને પકડનારા શિકારીઓને ત્રણથી સાત વર્ષની જેલ અને 10,000 રૂપિયાના દંડની જોગવાઈ પણ છે.