Video/ રાજપીપળાની બેંકમાં ₹ 1.93 કરોડની જંગી ઠગાઈ! પૂર્વ કેશ ઓફિસર સામે ફરિયાદ

નર્મદા જિલ્લાના મુખ્ય મથક રાજપીપળાની એક બેંકમાં વિશાળ કૌભાંડ સામે આવ્યું છે. બેંકના કેશ ઓફિસર તરીકે ફરજ બજાવતા પૂર્વ કર્મચારીએ કુલ રૂપિયા 1.93 કરોડની જંગી રકમની ઠગાઈ કરી હોવાની ફરિયાદ રાજપીપળા પોલીસ સ્ટેશનમાં નોંધાઈ છે. બેંક મેનેજરની ફરિયાદના આધારે પોલીસે ગુનો નોંધીને તપાસના ચક્રો ગતિમાન કર્યા છે.

સિસ્ટમમાં રકમ, પણ ATMમાં ગાયબ!

રાજપીપળાની બેંકની મુખ્ય શાખામાં મેનેજર તરીકે ફરજ બજાવતા વિશાલ કૈલાશ સોનીએ આ અંગે ફરિયાદ નોંધાવી છે. ઠગાઈનો આ મામલો ત્યારે સામે આવ્યો જ્યારે બેંકના વોટ્સએપ ગ્રુપમાં સંતોષ ચાર રસ્તા પાસેનું એક ATM 'આઉટ ઓફ સર્વિસ' બતાવતું હતું.

બેંકના અધિકારીઓએ તપાસ કરી ત્યારે ચોંકાવનારી વિગતો સામે આવી:

બેંકના વિવિધ ATMમાં સિસ્ટમમાં કુલ ₹ 1.93 કરોડ જેટલી રકમ બતાવતી હતી, પરંતુ વાસ્તવમાં ATMમાં આટલી મોટી રકમ નહોતી.

પૂર્વ કેશ ઓફિસર શંકાના દાયરામાં

શંકા જતાં અધિકારીઓએ આ અંગે અગાઉના કેશ ઓફિસરની પૂછપરછ કરી હતી, જેમની હાલમાં નસવાડી શાખામાં બદલી થઈ ગઈ છે. જોકે, આ કર્મચારીએ શરૂઆતમાં ટેકનિકલ સમસ્યા હશે તેમ જણાવીને પોતાનો બચાવ કર્યો હતો.

તમામ ATMની રોકડ રકમની વિસંગતતા સ્પષ્ટ થતાં, બેંક મેનેજરે આ પૂર્વ કર્મચારી સામે પોલીસ ફરિયાદ નોંધાવી છે.

પૂર્વ કર્મચારીની કામગીરીનો સમયગાળો: 25 જુલાઈ 2022 થી 27 ઓક્ટોબર 2025 સુધી મુખ્ય શાખા ખાતે કેશ ઓફિસર તરીકે ફરજ બજાવતા હતા.

DySP વિરલ ચંદન (નર્મદા) એ આ અંગે માહિતી આપતા જણાવ્યું હતું કે રાજપીપળા પોલીસે આ ગંભીર ઠગાઈના મામલે વધુ તપાસ હાથ ધરી છે અને આરોપીને ઝડપી પાડવાની કામગીરી ચાલુ છે.