Video/ અમિત ખૂંટ આપઘાત કેસ: રાજદીપસિંહ જાડેજા જૂનાગઢ જેલમાંથી મુક્ત, રિબડામાં ભવ્ય સ્વાગત

ગોંડલના ચર્ચિત અમિત ખૂંટ આપઘાત કેસમાં સંડોવાયેલા અને જૂનાગઢ જેલમાં બંધ રાજદીપસિંહ જાડેજા (રિબડા) ના ગોંડલ કોર્ટે જામીન મંજૂર કર્યા છે. જામીન મળતા જ તેઓ જેલમાંથી બહાર આવ્યા છે અને પોતાના વતન રિબડા ખાતે પહોંચ્યા હતા.

ઢોલ-નગારા અને આતશબાજી સાથે સ્વાગત

રાજદીપસિંહ જાડેજા જૂનાગઢ જેલમાંથી મુક્ત થઈ રિબડા પહોંચતા જ તેમના સમર્થકોમાં અનેરો ઉત્સાહ જોવા મળ્યો હતો. ગામના પાદરે તેમના સ્વાગત માટે મોટી સંખ્યામાં લોકો ઉમટી પડ્યા હતા. સમર્થકો દ્વારા ઢોલ-નગારા અને ફટાકડાની ભવ્ય આતશબાજી સાથે તેમનું અભિવાદન કરવામાં આવ્યું હતું.

દેવ દર્શન કરી નિવાસસ્થાને પહોંચ્યા

રિબડા પહોંચ્યા બાદ રાજદીપસિંહ જાડેજાએ સૌ પ્રથમ ધાર્મિક સ્થાનોએ શીશ નમાવ્યું હતું. તેમણે ગામમાં આવેલા મહીરાજ હનુમાનજી મંદિરે જઈ દર્શન કર્યા હતા. ત્યારબાદ આશાપુરા માતાજીના મંદિરે જઈ આશીર્વાદ લીધા હતા.

મંદિરે દર્શન કર્યા બાદ તેઓ પોતાના નિવાસસ્થાને પહોંચ્યા હતા, જ્યાં પરિવારજનોએ પરંપરાગત રીતે કુમકુમ તિલક અને ફૂલહાર પહેરાવી તેમનું ભાવભીનું સ્વાગત કર્યું હતું.

નિવાસસ્થાને સમર્થકોની ભીડ

રાજદીપસિંહ જેલમાંથી બહાર આવ્યા હોવાના સમાચાર મળતા જ રિબડા સ્થિત તેમના નિવાસસ્થાને મોટી સંખ્યામાં સમર્થકો અને કાર્યકરો ઉમટી પડ્યા હતા. ઉલ્લેખનીય છે કે, અમિત ખૂંટ આપઘાત કેસમાં લાંબા સમયથી કાયદાકીય પ્રક્રિયા ચાલી રહી હતી, જે અંતર્ગત ગોંડલ કોર્ટે જામીન મંજૂર કરતા તેમને મોટી રાહત મળી છે.