Vadodaraમાં 15 લાખના અફીણ સાથે ડ્રગ્સ પેડલર ઝડપાયો, એક વર્ષમાં રૂ.1.75 કરોડનું ડ્રગ્સ ઝડપાયું
છેલ્લું અપડેટ : 04 Dec 2025
વડોદરા શહેર પોલીસ દ્વારા ડ્રગ્સ સામે ઝુંબેશ જારી રાખવામાં આવી છે. જે દરમિયાન છાણી પોલીસે 15 લાખના અફીણનો મોટો જથ્થો ઝડપી પાડ્યો છે. પોલીસે 15 દિવસમાં ડ્રગ્સના 7 કેસ કર્યા છે.
વડોદરા પોલીસ કમિશનર દ્વારા મિશન ક્લીન હેઠળ ડ્રગ્સ સામે ઝુંબેશ ઉપાડવામાં આવી છે. જે દરમિયાન વડોદરા પોલીસે એક વર્ષના ગાળામાં રૂ.1.75 કરોડનું ડ્રગ્સ ઝડપી પાડ્યું છે. પોલીસ દ્વારા ડ્રગ્સ માટે અવેરનેસ કાર્યક્રમો પણ કરવામાં આવી રહ્યા છે.
ગઈકાલે ફતેગંજ વિસ્તારમાં સ્કૂટર ઉપર ગાંજો વેચતા એક કેરિયરને ઝડપી પાડવામાં આવ્યો હતો. જ્યારે છાણી પોલીસે પણ ડ્રગ્સનો મોટો જથ્થો ઝડપી પાડ્યો છે.
છાણી બાજવા રોડ પર આવેલી મારુતિ નંદન સોસાયટીમાં રહેતો એક ડ્રગ્સ પેડલર અફીણનો મોટો જથ્થો રાખતો હોવાની અને ઘરમાંથી વેચાણ પણ કરતો હોવાની વિગતો મળતા પીઆઇ આર એલ પ્રજાપતિ અને ટીમે દરોડો પાડી શ્રવણ વાગારામ જાટ (ચૌધરી) (મૂળ રહે. ખારા ગામ, સાચોર,રાજસ્થાન) ને ઝડપી પાડ્યો હતો.
પોલીસે મકાનમાંથી 14.76 લાખની કિંમતનો 2.952 કિલો અફીણનો જથ્થો, અફીણના વેચાણના રૂ.36 900 અને બે મોબાઈલ મળી કુલ રૂ.15.68 લાખની મતા કબજે કરી રિમાન્ડ માટે તજવીજ કરી છે. પ્રાથમિક તપાસમાં આ જથ્થો તે પોતે રાજસ્થાનથી લઈ આવ્યો હોવાની વિગતો ખુલી છે. જેથી પોલીસે તેની ધરપકડ કરી સપ્લાયરની શોધખોળ હાથ ધરી છે. નોંધનીય છે કે છેલ્લા 15 દિવસમાં વડોદરા શહેર પોલીસે ડ્રગ્સનો સાતમો કેસ કર્યો છે.
