VIDEO: પંચમહાલમાં વરસાદે હાલ કર્યા બેહાલ, પાવાગઢ પરથી ધોધની જેમ પાણી વહેતા પ્રવાસીઓ અટવાયા

છેલ્લા 5 દિવસથી ગુજરાતમાં સતત વરસાદી માહોલ રહ્યો છે. એમાંય પંચમહાલ જિલ્લાના પાવાગઢ ખાતે ભારે વરસાદે હાલ બેહાલ કર્યા છે. પાવાગઢ ખાતે ભારે વરસાદને પગલે ડુંગર ઉપરથી પાણી વેગ સાથે ધસમસતું નીચે આવી રહ્યું છે. પાણીના પ્રવાહનો વેગ એટલો ઝડપી હતો કે ડુંગર ઉપર ચઢવા ઉતારવાના પગથિયાંનો ઉપયોગ જોખમી બનતા પ્રવાસીઓ અટવાયા છે.

સમગ્ર ગુજરાતમાં મેઘરાજા મહેરબાન થયા છે, ત્યારે પંચમહાલ જિલ્લાના હાલોલ તાલુકામાં મેઘરાજાએ ધમાકેદાર બેટિંગ કરતા માત્ર બે કલાકમાં 6.69 ઈંચ જેટલો વરસાદ ખાબક્યો છે. ભારે વરસાદના કારણે હાલોલના મુખ્ય માર્ગો પાણીમાં ગરકાવ થઈ ગયા છે અને રસ્તાઓ નદીમાં ફેરવાયા હોય તેવા દ્રશ્યો સર્જાયા છે.

2 કલાકમાં 40 તાલુકામાં વરસાદ

રાજ્યમાં છેલ્લા 2 કલાક દરમિયાન 40 તાલુકાઓમાં હળવાથી ભારે વરસાદ નોંધાયો છે. સૌથી વધુ વરસાદ પંચમહાલના હાલોલમાં થયો છે, જ્યાં બે કલાકમાં 6 ઈંચ વરસાદ પડ્યો છે. આ ઉપરાંત, સુરતના કામરેજમાં 1.18 ઈંચ, વલસાડના ઉમરગામમાં 1.14 ઈંચ, ખેડાના મહુવામાં 0.83 ઈંચ અને નડિયાદમાં 0.71 ઈંચ વરસાદ નોંધાયો છે.

લોકોને હાલાકીનો સામનો કરવો પડ્યો

ભારે વરસાદના કારણે હાલોલમાં જનજીવન અસ્તવ્યસ્ત થઈ ગયું છે. નીચાણવાળા વિસ્તારોમાં પાણી ભરાઈ ગયા છે, જેના કારણે લોકોને ભારે હાલાકીનો સામનો કરવો પડી રહ્યો છે. અનેક વાહનો રસ્તામાં ફસાઈ ગયા છે. તંત્ર દ્વારા લોકોને સાવચેતી રાખવા અને બિનજરૂરી ઘરની બહાર ન નીકળવા અપીલ કરવામાં આવી છે. આગામી દિવસોમાં પણ ભારે વરસાદની આગાહી છે, જેથી તંત્ર દ્વારા એલર્ટ રહેવા સૂચના આપવામાં આવી છે.

ગુજરાતમાં સિઝનનો 88 ટકા વરસાદ

ગુજરાતમાં હજુ સુધી સિઝનનો 88 ટકા જેટલો વરસાદ વરસી ચૂક્યો છે.જેમાં 43 તાલુકામાં 40 ઈંચથી વધુ વરસાદ નોંધાયો છે. રાજ્યના 103 તાલુકામાં ગુરૂવારે મેઘમહેર થઇ હતી. જેમાં તાપીના ડોલવણમાં બે કલાકમાં પાંચ સહિત સૌથી વધુ 7 ઈંચ વરસાદ નોંધાયો હતો. હવામાન વિભાગ દ્વારા હજુ સાત દિવસ ગુજરાતમાં ભારે વરસાદ માટે એલર્ટ આપવામાં આવ્યું છે.