Surat/ સાંસદના હોમટાઉનમાં ધર્માંતરણનું મોટું નેટવર્ક, માસ્ટર માઈન્ડની નજીકની ગણાતી મહિલા શિક્ષિકા ઝડપાઈ!
છેલ્લું અપડેટ : 03 Jan 2026
સુરત જિલ્લાના માંડવીમાં ધર્માંતરણના મસમોટા નેટવર્કનો પર્દાફાશ થયા બાદ પોલીસ એક્શનમાં છે. સ્થાનિક સાંસદ પ્રભુ વસાવાના હોમટાઉનમાં જ ધર્મ પરિવર્તનનું ઝેર ફેલાવવામાં આવી રહ્યું હોવાની ચોંકાવનારી વિગતો સામે આવી છે. આ કેસમાં હવે એક મહિલા શિક્ષિકાની ધરપકડ થતા શિક્ષણ જગતમાં પણ ચકચાર મચી ગઈ છે.
કોણ છે ધરપકડ કરાયેલ મહિલા?
ધર્માંતરણના આ નેટવર્કની તપાસમાં પોલીસના હાથે મીનાબેન ચિરાગ ચૌધરી નામની મહિલા ઝડપાઈ છે. મીનાબેન ચૌધરી મહુડી પ્રાથમિક શાળામાં શિક્ષિકા તરીકે ફરજ બજાવે છે. તે ધર્માંતરણના માસ્ટર માઈન્ડ ગણાતા રામજી ચૌધરીની અત્યંત નજીકની સાગરીત હોવાનું બહાર આવ્યું છે.
ફરિયાદમાં મોટો ખુલાસો
ભોગ બનનાર યુવતીએ પોલીસ ફરિયાદમાં જણાવ્યું હતું કે, જ્યારે તેનું ધર્માંતરણ કરાવવામાં આવી રહ્યું હતું ત્યારે આ શિક્ષિકા મીના ચૌધરી ત્યાં હાજર હતી અને સમગ્ર પ્રક્રિયામાં સક્રિય ભૂમિકા ભજવી રહી હતી. એક શિક્ષિકા જેનું કામ સમાજને સાચો રસ્તો બતાવવાનું છે, તે જ આ પ્રકારની ગેરકાયદે પ્રવૃત્તિમાં સામેલ હોવાથી લોકોમાં ભારે રોષ જોવા મળી રહ્યો છે.
તપાસનો ધમધમાટ
માંડવી જેવા વિસ્તારમાં જ્યાં મોટા રાજકીય નેતાઓનું નિવાસસ્થાન છે, ત્યાં આટલું મોટું નેટવર્ક કેવી રીતે ફૂલ્યું-ફાલ્યું? રામજી ચૌધરી અને તેની આ ટોળકીએ અત્યાર સુધી કેટલા લોકોના ધર્માંતરણ કરાવ્યા છે? પોલીસ હવે આ તમામ દિશાઓમાં તપાસ કરી રહી છે.
આગામી દિવસોમાં આ નેટવર્ક સાથે જોડાયેલા વધુ 'મોટા માથાઓ'ના નામ બહાર આવે તેવી પૂરેપૂરી શક્યતા છે.
