Video: દૂધરેજ પાસે માલગાડી ખડી પડતાં રેલવે તંત્ર દોડતું થયું, ટ્રેન વ્યવહાર પ્રભાવિત

સુરેન્દ્રનગર નજીક દૂધરેજ પાસે આવેલા મામાના મંદિર નજીક આજે એક મોટી રેલવે દુર્ઘટના સર્જાઇ છે, જ્યાં એક માલગાડી અચાનક પાટા પરથી નીચે ખડી પડી હતી. ઘટનાને પગલે આસપાસના વિસ્તારમાં ભારે અફરાતફરી મચી ગઈ હતી. સદભાગ્યે આ દુર્ઘટનામાં માલગાડી હોવાથી કોઈ જાનહાનિના અહેવાલ નથી, પરંતુ રેલવે ટ્રેકને મોટું નુકસાન પહોંચ્યું છે.

રેલ વ્યવહાર ખોરવાયો

માલગાડી પાટા પરથી ખડી પડવાના કારણે મુખ્ય રાજકોટ-સુરેન્દ્રનગર રેલવે લાઈન પરનો સમગ્ર રેલ વ્યવહાર સંપૂર્ણપણે ખોરવાઈ ગયો છે. અકસ્માતને કારણે આ રૂટ પરથી પસાર થતી અનેક પેસેન્જર તેમજ એક્સપ્રેસ ટ્રેનોની અવર-જવર પર માઠી અસર પડી છે. ખાસ કરીને વિરમગામ તરફથી આવતી લાંબા અંતરની ટ્રેનો તેમજ રાજકોટ તરફ જતી ટ્રેનો પ્રભાવિત થવાની શક્યતા છે, જેને પગલે મુસાફરોને ભારે રઝળપાટ અને હાલાકીનો સામનો કરવો પડી રહ્યો છે.

રેલવે તંત્રની યુદ્ધના ધોરણે કામગીરી

ઘટનાની જાણ થતાં જ રેલવે શિડ્યુલ અને લાઈન ક્લિયર કરાવવા માટે રેલવે વિભાગના ઉચ્ચ અધિકારીઓ અને એન્જિનિયરોની ટેકનિકલ ટીમ તાત્કાલિક ઘટનાસ્થળે પહોંચી ગઈ હતી. રેલવે ટ્રેક પરથી ખડી પડેલા માલગાડીના ડબ્બાઓને હટાવીને ટ્રેક રિપેરિંગની કામગીરી યુદ્ધના ધોરણે શરૂ કરી દેવામાં આવી છે. રેલવે પ્રશાસન દ્વારા ટ્રેક વહેલી તકે કાર્યરત થાય અને ટ્રેન વ્યવહાર પુનઃ પૂર્વવત બને તે માટે સતત પ્રયાસો હાથ ધરવામાં આવી રહ્યા છે.