જાંબુઘોડા મામલતદાર કચેરીમાં ACBનો સપાટો! જમીનમાં નામ ચડાવવા ₹25 હજાર લેતો ક્લાર્ક રંગે હાથ ઝડપાયો!
છેલ્લું અપડેટ : 05 Sept 2026
પંચમહાલ જિલ્લામાં જાંબુઘોડા મામલતદાર કચેરીની એટીવીટી શાખામાં ફરજ બજાવતો મહેસૂલી ક્લાર્ક જમીનના દસ્તાવેજ બાદ રેવન્યૂ રેકર્ડમાં નામ દાખલ કરી નોંધ પાડવાના અવેજ પેટે રૂપિયા 25 હજારની લાંચ લેતા રંગે હાથ ઝડપાઈ ગયો છે.
પ્રાપ્ત વિગતો મુજબ જમીન વેચાણનો દસ્તાવેજ થયા બાદ રેવન્યૂ રેકર્ડમાં નામ દાખલ કરવા માટે જાંબુઘોડા મામલતદાર કચેરી ખાતે અરજી કરવામાં આવી હતી. આ અંગેની કાર્યવાહી કરવા તેમજ નોંધ પાડી આપવાના બદલામાં મામલતદાર કચેરીની એટીવીટી શાખાના ક્લાર્ક સુરપાલસિંહ ભુરસિંહ ઝાલાએ રૂપિયા 25 હજારની લાંચની માંગણી કરી હતી.
જમીન માલિક લાંચની રકમ આપવા માંગતા નહી હોવાથી એસીબીમાં ફરિયાદ કરી હતી. ફરિયાદના આધારે મહીસાગર એસીબી પોલીસ સ્ટેશનના પોલીસ ઇન્સ્પેક્ટર એમ.એમ. તેજોત તથા સ્ટાફે જાંબુઘોડા મામલતદાર કચેરી ખાતે લાંચનું છટકું ગોઠવ્યું હતું.
દરમિયાન ક્લાર્ક સુરપાલસિંહ ઝાલાએ જમીન માલિક સાથે વાતચીત કરી રૂપિયા 25 હજારની લાંચની રકમ સ્થળ પર જ સ્વીકારી હતી. લાંચની રકમ સ્વીકારતાની સાથે જ એસીબીની ટીમે તેને લાંચની રકમ સાથે ઝડપી લીધો હતો. આ અંગે ભ્રષ્ટાચાર અધિનિયમ હેઠળ ગુનો દાખલ કરી વધુ તપાસ હાથ ધરવામાં આવી છે.