સુરત થવા લાગ્યું ખાલી, બે દિવસમાં 300થી વધુ બસ રત્નકલાકારોને લઈને ઉપડી માદરે વતન
સુરતના ડાયમંડ અને અન્ય ઉદ્યોગમાં દિવાળી વેકેશનની શરૂઆત થઈ જતા 26 ઓક્ટોબરથી એસટી દ્વારા એક્
સુરતના ડાયમંડ અને અન્ય ઉદ્યોગમાં દિવાળી વેકેશનની શરૂઆત થઈ જતા 26 ઓક્ટોબરથી એસટી દ્વારા એક્સ્ટ્રા બસોની સુવિધા કરવામાં આવી છે. કાપોદ્રા ધારુકાવાળા કોલેજ ગ્રાઉન્ડ ખાતેથી પ્રથમ બે દિવસમાં 300થી વધુ બસ રત્નકલાકારોને લઈને માદરે વતન જવા માટે નીકળી ગઈ છે. જેથી એસટી વિભાગને અંદાજે 45 લાખથી વધુની આવક થઈ છે.
બે જગ્યાથી બસ ઉપડી રહી છે
‘એસ.ટી. આપના દ્વારે’ અંતર્ગત માદરે વતન જઈ રહેલા કતારગામના મુસાફરોની આંબા તલાવડી પાસે નિરૂ ફાર્મ અને ધારૂકા કોલેજ ગ્રાઉન્ડ ખાતેથી લોકો બસમાં બેસી વતન જઈ રહ્યા છે. હીરા ઉદ્યોગમાં મંદી હોવાના કારણે આ વખતે ખાનગી લક્ઝરીના ભાડા રત્નકલાકાર પરિવારોને પોસાય તેવું ન હોવાથી એસટીમાં જવા વાળાની ભીડ વધારે જોવા મળી હતી. 400થી વધારે બસોનું બુકિંગ ઓનલાઇન થયું હતું અને બાકીના સ્થળ પર એક બસના પેસેન્જર થઈ જાય એટલે બસને ઉપાડવામાં આવે છે.
સામાન્ય લોકોને મોટો ફાયદો
ભાવનગર, સાવરકુંડલા, અમરેલી, ધારી, રાજકોટ, ગોંડલ, ગારિયાધાર સહિતના રૂટની બસોનો અવિરત પ્રવાહ ચાલુ રહ્યો હતો. આગામી બે દિવસમાં મોટાભાગના લોકો જતા રહેશે. ખાનગી બસમાં 2200થી 3000 રૂપિયા ડબલ સોફાના આપવા પડતા હોય છે. તેની સામે એસટીમાં સિંગલ વ્યક્તિ માટે 360 અથવા તેની આજુબાજુ ટિકિટ થતી હોય છે. ખાનગી બસ કરતાં એસટીમાં 50 ટકા ફાયદો થાય છે.સુરતથી ગુજરાત અલગ અલગ સિટી અને ગામડાઓ સુધી છેલ્લા બે દિવસથી એસટી બસ ઉપાડવામાં આવી રહી છે. છેલ્લા બે દિવસમાં 240થી વધી બસ ઉપાડવામાં આવી હતી. આ બસ થકી 13000 જેટલા લોકો પોતાના વતન પહોંચ્યા હતા. આ મુસાફરોના કારણે સુરત એસટી વિભાગની 45 લાખની આવક થઈ છે.
