સેવાનું સ્વપ્ન કે મેવાનો મોહ? માત્ર 15 હજાર પગાર છતાં કાઉન્સિલર બનવા કરોડપતિ ઉમેદવારોની લાંબી કતાર

કોઈ પણ કામ શરૂ કરતા પહેલાં તેની સામે કેટલું મહેનતાણું મળશે? તેવો વિચાર વ્યક્તિને સ્વાભાવિક રીતે આવતો હોય છે. પરંતુ પ્રજાની સેવા કરવા ઇચ્છા ધરાવતા નેતાઓ જેમને સેવાની પડી છે, એટલે જ તો મ્યુનિ. કાઉન્સિલરને મહિને માત્ર 15થી 16 હજાર જેટલો પગાર મળતો હોવા છતાં ઉમેદવારોની કતારો લાગી છે. ખુરશીનો આ તે કેવો ખેલ કે લખપતિ, કરોડપતિ, એમબીએ, બીએસસી કરેલા ઉમેદવારોએ પણ રાજકારણમાં ઝંપલાવ્યું છે. તેની પાછળ સેવા કરતા પણ કોઈ સૂચક કારણ વધુ જવાબદાર હોય છે.

નગરસેવક બનવા માટે ઉમેદવારોમાં ભારે ઉત્સાહ

કોઈને રાતોરાત રાજકારણમાં રસ જાગી ગયો, તો કોઈને નગરસેવક બનવાનું સ્વપ્ન આવ્યું હોય તેમ ઉમેદવારો મ્યુનિ. કાઉન્સિલર બનવા થનગની રહ્યા છે. આ વખતે અમદાવાદના કોર્પોરેટરની 192 સીટ માટે ધોરણ 9 પાસથી લઈને એમબીએ, સીએ, બીએસસી કરેલા ઉમેદવારો સહિત કુલ 1553 દાવેદારો પોતાનું નસીબ આઝમાવશે. ત્યારે સામાન્ય માણસના મનમાં સવાલ ઉઠે છે.

મ્યુનિ. કાઉન્સિલરોની સેલેરી સ્લીપ

મેયર અને સમિતિઓના ચેરમેનને મળતા લાભ

મેયર, ડે. મેયર, પક્ષ નેતા, વિપક્ષ નેતા, દંડક તેમજ મ્યુનિ.ની સ્ટેન્ડિંગ, આરોગ્ય, શિક્ષણ, પાણી, ટ્રાન્સપોર્ટ સહિત 12 જેટલી સમિતિના ચેરમેનને કાર અને ડ્રાઈવરની સુવિધા મળતી હોય છે. જ્યારે મેયરને ટર્મ દરમિયાન રહેવા માટે અલગ બંગલો પણ મળે છે.

શું નેતાઓ ખરેખર માત્ર 15-16 હજારમાં જ ગુજરાન ચલાવે છે?

જો કે સરકારી ચોપડે તો મ્યુનિ. કાઉન્સિલરોને દર મહિને પગાર અને ભથ્થા સહિત કુલ 15થી 16 હજાર જેટલું મામૂલી વેતન જ મળે છે. પાંચ વર્ષમાં નવા મોબાઈલ ફોન માટે બે વખત 15 હજાર રૂપિયા તેમજ એક વખત લેપટોપ તથા કમ્પ્યુટર માટે 1.20 લાખની રકમ મળે છે. વર્ષ 2015 સુધી તો ફક્ત 8 હજાર વેતન જ મળતું હતું. કોઈ પટ્ટાવાળા કે ચોકીદારને પણ કદાચ આનાથી વધુ પગાર મળતો હશે. પરંતુ નેતાઓએ ક્યારેય વેતન વધારવાની પણ રજૂઆત કરી નથી. આ સિવાય પ્રજાના કામ માટે 40 લાખની ગ્રાન્ટ જરૂર મળતી હોય છે. પણ આ તો ફક્ત સરકારી ચોપડે થતો હિસાબ છે.