Rajkot/ 1.62 કરોડના દાગીનાની ફિલ્મી ઢબે ચોરી, પોલીસ તપાસ તેજ

રાજકોટ  શહેરના બી ડિવિઝન પોલીસ સ્ટેશન વિસ્તારમાં રૂપિયા 1.62 કરોડની કિંમતના દાગીનાની ચોરીનો મામલો સામે આવતા સમગ્ર પંથકમાં ચકચાર મચી ગઈ છે. આ ઘટનામાં ચોર ટોળકીએ અત્યંત વ્યવસ્થિત આયોજન સાથે મોટી ચોરીને અંજામ આપ્યો છે.

માત્ર 25 મિનિટમાં ખેલ ખતમ

પ્રાથમિક તપાસમાં બહાર આવ્યું છે કે ચોરીની આ ઘટનાને અંજામ આપવા માટે આરોપીઓ ક્રેટા કારમાં સવાર થઈને આવ્યા હતા. ચોંકાવનારી વાત એ છે કે, આરોપીઓએ આ આખી ચોરી માત્ર 20 થી 25 મિનિટના ટૂંકા ગાળામાં જ કરી નાખી હતી.

પોલીસને ગેરમાર્ગે દોરવા રચ્યું કાવતરું

આરોપીઓએ પકડાઈ ન જવાય તે માટે પોલીસને ગેરમાર્ગે દોરવાના પૂરતા પ્રયાસો કર્યા હતા. કાર પર ખોટી નંબર પ્લેટ લગાવીને તેઓ ગુનો કરવા આવ્યા હતા જેથી ટેકનિકલ તપાસમાં અડચણ ઉભી કરી શકાય.

તપાસ માટે ટેકનોલોજી અને સ્પેશિયલ ટીમની મદદ

ચોરીની ગંભીરતાને જોતા પોલીસ દ્વારા ચોરીના સમયે ઘટનાસ્થળ આસપાસ એક્ટિવ રહેલા મોબાઈલ નંબરનું લિસ્ટ મેળવવા  'ટાવર ડમ્પિંગ' પદ્ધતિનો ઉપયોગ કર્યો છે. હાલમાં પોલીસ આ નંબરો અને ડેટાનું ઊંડાણપૂર્વક એનાલિસિસ કરી રહી છે.