ગુજરાતમાં ભારે વરસાદને કારણે 15ના મોત, 6000 જેટલા લોકોનું સ્થળાંતર, બે દિવસ રેડ એલર્ટ

Gujarat rain : ભારતીય હવામાન વિભાગ (IMD) એ કહ્યું છે કે ગુજરાત પર હજુ પણ ઊંડું દબાણ છે, જેના કારણે આગામી બે દિવસ 28-29 ઓગષ્ટ  રાજ્યના અનેક વિસ્તારોમાં ભારે વરસાદની સંભાવના છે. IMD એ રાજ્યમાં 29 ઓગસ્ટ સુધી રેડ એલર્ટ જાહેર કર્યું છે. વિભાગે કહ્યું છે કે આ સમયગાળા દરમિયાન ભારે ગતિએ પવન ફૂંકાશે અને મુશળધાર વરસાદ પડશે.

તાજેતરના બુલેટિનમાં, IMDએ જણાવ્યું છે કે ડીપ ડિપ્રેશન ધીમે ધીમે ગુજરાત પ્રદેશમાં પશ્ચિમ-દક્ષિણ-પશ્ચિમ દિશા તરફ આગળ વધી રહ્યું છે અને 29 ઓગસ્ટની સવાર સુધીમાં તે સૌરાષ્ટ્ર, કચ્છના દરિયાકાંઠા અને પાકિસ્તાન અને ઉત્તરપૂર્વ અરબી સમુદ્રની આસપાસના વિસ્તારોમાં પહોંચશે સુધી પહોંચવાની શક્યતા.

ત્રણ દિવસથી ભારે વરસાદ, 6000 જેટલા લોકોનું સ્થળાંતર

ગુજરાતના વિવિધ ભાગોમાં છેલ્લા ત્રણ દિવસથી ભારે વરસાદ પડી રહ્યો છે. ઘણા શહેરોમાં પાણી ભરાઈ જવાના કારણે લોકોને ભારે મુશ્કેલીનો સામનો કરવો પડી રહ્યો છે. રાજ્યભરમાં વરસાદ સંબંધિત ઘટનાઓમાં ઓછામાં ઓછા સાત લોકોએ જીવ ગુમાવ્યા છે, જ્યારે લગભગ છ હજાર લોકોએ અન્ય સ્થળોએ આશ્રય લેવો પડ્યો છે.

ગુજરાતમાં મંગળવારે સતત ત્રીજા દિવસે ભારે વરસાદ ચાલુ રહ્યો હતો, જેના કારણે સામાન્ય જીવન ખોરવાઈ ગયું હતું અને નીચાણવાળા વિસ્તારોમાં પૂરની સ્થિતિ સર્જાઈ હતી. તેમણે કહ્યું કે સતત વરસાદને કારણે ડેમ અને નદીઓના જળસ્તરમાં વધારાને જોતા છ હજારથી વધુ લોકોને સલામત સ્થળે ખસેડવામાં આવ્યા છે.

રાજ્યમાં 15 લોકોના મોત 

રાજ્યના વિવિધ ભાગોમાં વરસાદ સંબંધિત ઘટનાઓમાં સોમવારે 15 લોકોના મોત થયા હતા. મોરબીમાં 1, ગાંધીનગરમાં 2, આણંદમાં 6, વડોદરામાં 1, ખેડામાં 1, મહિસાગરમાં 2, ભરૂચમાં 1 અને અમદાવાદમાં 1 વ્યક્તિએ જીવ ગુમાવ્યો છે.

પંચમહાલ, નવસારી, વલસાડ, વડોદરા, ભરૂચ, ખેડા, ગાંધીનગર, બોટાદ અને અરવલ્લી જિલ્લાઓમાં વહીવટીતંત્રોએ નદીઓ અને ડેમોમાં પાણીના સ્તરમાં વધારો અને નીચાણવાળા વિસ્તારોમાં પૂરની સ્થિતિ વચ્ચે સાવચેતીના પગલા તરીકે સેંકડો લોકોને સલામત સ્થળે ખસેડ્યા છે. 

ગુજરાતમાં અત્યાર સુધીમાં લગભગ 100 ટકા વરસાદ થયો 

પંચમહાલમાં જિલ્લા વહીવટીતંત્રે લગભગ બે હજાર લોકોને સલામત સ્થળે ખસેડ્યા છે, જ્યારે નવસારીમાં આ આંકડો 1,200, વડોદરામાં 1,000 અને વલસાડમાં 800 છે. સ્ટેટ ઇમરજન્સી ઓપરેશન સેન્ટર (SEOC) દ્વારા શેર કરવામાં આવેલા ડેટા અનુસાર, ગુજરાતમાં અત્યાર સુધીમાં સરેરાશ વાર્ષિક વરસાદના લગભગ 100 ટકા વરસાદ થયો છે. માહિતી અનુસાર, રાજ્યના કચ્છ, સૌરાષ્ટ્ર અને દક્ષિણ ગુજરાતના જિલ્લાઓમાં સરેરાશ વાર્ષિક વરસાદના 100 ટકાથી વધુ વરસાદ થયો છે.

મોરબીના ટંકારામાં સૌથી વધુ વરસાદ 

મોરબી જિલ્લાના ટંકારા તાલુકામાં મંગળવારે સવારે 6 વાગ્યે પૂરા થયેલા 24 કલાકના સમયગાળામાં 347 મીમી વરસાદ નોંધાયો હતો, જે રાજ્યમાં સૌથી વધુ છે. આ સાથે જ પંચમહાલના મોરવા હડફમાં 346 મીમી, ખેડાના નડિયાદમાં 327 મીમી, આણંદના બોરસદમાં 318 મીમી, વડોદરા તાલુકામાં 316 મીમી અને આણંદ તાલુકામાં 314 મીમી વરસાદ નોંધાયો છે. 251 તાલુકામાંથી ઓછામાં ઓછા 24 તાલુકાઓમાં 200 મીમીથી વધુ વરસાદ નોંધાયો છે, જ્યારે મંગળવારે સવારે 6 વાગ્યે પૂરા થયેલા 24 કલાકના સમયગાળામાં 91 તાલુકાઓમાં 100 મીમીથી વધુ વરસાદ થયો છે.