ગુજરાત સરકારનો પેન્શનરો માટે મોટો નિર્ણય: 5મા પગાર પંચના પેન્શનરોના DAમાં જંગી વધારો, 443% ભથ્થા સાથે 3 વર્ષનું એરિયર્સ ચૂકવાશે

ગુજરાત સરકારના નાણાં વિભાગ દ્વારા રાજ્યના નિવૃત્ત કર્મચારીઓ અને ફેમિલી પેન્શનરો માટે દિવાળી પૂર્વે રાહતના મોટા સમાચાર જાહેર કરવામાં આવ્યા છે. 5મા પગાર પંચ હેઠળ પેન્શન મેળવતા પેન્શનરો અને કુટુંબ પેન્શનરોના મોંઘવારી ભથ્થાં (Dearness Allowance - DA) તથા ટેમ્પરરી ઇન્ક્રીઝ (TI)માં માતબર વધારો કરવાનો રાજ્ય સરકારે મહત્વપૂર્ણ ઠરાવ પસાર કર્યો છે.

DA વધીને 443% થયું

નાણાં વિભાગ દ્વારા જારી કરાયેલા નવા સત્તાવાર ઠરાવ અનુસાર, 5મા પગાર પંચ મુજબ પેન્શન મેળવતા કર્મચારીઓના મોંઘવારી ભથ્થાના દરમાં મોટો સુધારો કરવામાં આવ્યો છે. અગાઉ આ દર 381% હતો, જે હવે 1 જાન્યુઆરી 2024થી વધારીને સીધો 443% સુધી મંજૂર કરવામાં આવ્યો છે.

તબક્કાવાર વધારાનું ગણિત

સરકારે મોંઘવારી ભથ્થામાં તારીખ મુજબ નીચે પ્રમાણે તબક્કાવાર વધારો અમલી બનાવ્યો છે:

• 1 જુલાઈ 2022 થી: 396%

• 1 જાન્યુઆરી 2023 થી: 412%

• 1 જુલાઈ 2023 થી: 427%

• 1 જાન્યુઆરી 2024 થી: 443%

3 વર્ષના એરિયર્સની પણ થશે ચૂકવણી

પેન્શનર્સ માટે સૌથી મોટો ફાયદો એરિયર્સ (તફાવતની રકમ)ની ચૂકવણીનો છે. નાણાં વિભાગના ઠરાવમાં 1 જુલાઈ 2021 થી ચૂકવવાપાત્ર તફાવતની રકમનું વિગતવાર શેડ્યૂલ બહાર પાડવામાં આવ્યું છે. જુલાઈ 2021 થી જૂન 2024 સુધીના આશરે 3 વર્ષના સમયગાળા માટે તબક્કાવાર 56% થી લઈને 131% સુધીનો મોંઘવારી ભથ્થાનો તફાવત રોકડમાં ચૂકવાશે.

આ નિર્ણયથી ગુજરાત રાજ્યના 5મા પગાર પંચ હેઠળ આવતા હજારો નિવૃત્ત પેન્શનરો અને તેમના પરિવારોને મોંઘવારી સામે મોટી આર્થિક રાહત મળશે અને બેંક ખાતામાં મોટી રકમ જમા થશે.