GSEB Alert: ધોરણ 10 બોર્ડની પરીક્ષાના આંતરિક ગુણ અપલોડ કરવા આદેશ, જાણો શું છે છેલ્લી તારીખ અને પ્રોસેસ
છેલ્લું અપડેટ : 04 Feb 2026
GSEB Alert: ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા માર્ચમાં લેવાનાર ધોરણ 10ની પરીક્ષાઓને લઈને મહત્વના સમાચાર સામે આવ્યા છે. બોર્ડની મુખ્ય પરીક્ષાઓ હવે અંતિમ તબક્કામાં છે ત્યારે વિદ્યાર્થીઓના આંતરિક મૂલ્યાંકન (Internal Marks) અને શાળા કક્ષાના વિષયોના ગુણ ઓનલાઈન પોર્ટલ પર ભરવાની પ્રક્રિયા શરૂ કરવાની સૂચના આપવામાં આવી છે. જે gseb.org અને sscmarks.gseb.org પરથી ભરી શકાશે.
5 થી 21 ફેબ્રુઆરી સુધીની સમયમર્યાદા
બોર્ડ દ્વારા જાહેર કરવામાં આવેલી સૂચના મુજબ, ધોરણ 10 અને સંસ્કૃત પ્રથમાના પરીક્ષાર્થીઓના ગુણ ભરવા માટે 5 ફેબ્રુઆરી 2026 થી 21 ફેબ્રુઆરી 2026 સુધીનો સમય આપવામાં આવ્યો છે. શાળાઓએ આ સમયગાળા દરમિયાન બોર્ડની સત્તાવાર વેબસાઈટ પરથી ઓનલાઈન ડેટા એન્ટ્રી કરવાની રહેશે. જો કોઈ શાળા આ સમયમર્યાદામાં ગુણ અપલોડ કરવામાં નિષ્ફળ જશે, તો તેમની સામે કડક કાર્યવાહી થઈ શકે છે.
કઈ રીતે ભરવાના રહેશે ગુણ?
લોગ-ઈન પ્રક્રિયા: શાળાઓએ પોતાના ઈન્ડેક્ષ નંબર અને રજિસ્ટર્ડ મોબાઈલ નંબરનો ઉપયોગ કરીને લોગ-ઈન કરવાનું રહેશે.
પરીક્ષાર્થીની વિગતો: દરેક વિદ્યાર્થીના ગુણ તેમના નામ અને એપ્લિકેશન નંબરના આધારે સચોટ રીતે ભરવાના રહેશે.
વોકેશનલ વિષયો: જે શાળાઓમાં 'સેક્ટર સ્કીલ કાઉન્સીલ' (SSC)ના વોકેશનલ વિષયો ચાલે છે, તેવી શાળાઓએ પ્રાયોગિક મૂલ્યાંકનના 50 ગુણ પણ ઓનલાઈન ભરવાના રહેશે. આ માટે શાળાએ કાઉન્સીલના પ્રતિનિધિ પાસેથી મેળવેલા ગુણની એન્ટ્રી કરવાની રહેશે.
મૂંઝવણ માટે બોર્ડનો સંપર્ક કરવા સૂચના
જો ગુણ ભરવાની પ્રક્રિયામાં કોઈપણ શાળાને ટેકનિકલ સમસ્યા કે અન્ય મૂંઝવણ જણાય, તો તેઓ ગાંધીનગર ખાતે આવેલી બોર્ડની કચેરીની માધ્યમિક શાખાનો જરૂરી પુરાવાઓ સાથે સંપર્ક કરી શકશે. આ આંતરિક ગુણો વિદ્યાર્થીના ફાઈનલ રિઝલ્ટમાં મહત્વની ભૂમિકા ભજવે છે, તેથી શાળાઓને પૂરી તકેદારી રાખવા તાકીદ કરવામાં આવી છે.
