સુરતમાં મકાન પર બનેલા ગેરકાયદે શેડમાં રખાયેલા કેમિકલમાં લાગી આગ, એકનું મોત

સુરતમાં સતત આગના બનાવો બની રહ્યાં છે. ત્યારે સરથાણા વિસ્તારમાં આવેલા સીમાડા નાકા પાસે આવેલા વાલમનગર સોસાયટીમાં આગ લાગી ગઈ હતી. વાલમનગર સોસાયટીના મકાનમાં ત્રીજા માળે પતરાનો શેડ બનાવવામાં આવેલો હતો. જેમાં કેમિકલનો જથ્થો રાખવામાં આવ્યો હતો. ગોડાઉન તરીકે ઉપયોગ થતો હોવાથી કેમિકલમાં આગ લાગી ગઈ હતી. જેમાં એક વ્યક્તિનું મોત નીપજ્યું હતું.

દૂર દૂર દેખાયો ધુમાડો

સીમાડા નાકા પાસે આવેલ વાલમનગર સોસાયટીમાં કેમિકલના ગોડાઉનમાં આગ લાગી ગઈ હતી. આગ લાગતાં આસપાસમાં ભયનો માહોલ પેદા થયો હતો. કેમિકલમાં આગ લાગી હોવાથી ધુમાડો દૂર દૂર સુધી જોવા મળ્યો હતો. સ્થાનિકોએ ફાયરબ્રિગેડને જાણ કરતાં કાફલો ઘટના સ્થળે દોડી આવ્યો હતો. જેમણે પાણીનો મારો ચલાવી આગ પર કાબુ મેળવ્યો હતો.

ગેરકાયદે શેડ

ફાયરબ્રિગેડના અધિકારીએ કહ્યું કે, કોલ મળતાં ફાયર કાફલો ઘટના સ્થળે દોડી આવ્યો હતો. 5 લોકો ફસાયા હતાં. જેમને બહાર કાઢવામાં આવ્યા હતાં. એક મૃતદેહ પણ મળી આવ્યો છે. સમગ્ર પતરાનો શેડ ગેરકાયદેસર રીતે ઉભો કરવામાં આવ્યો હતો. તેમાં કેમિકલનો જથ્થો હોવાથી આગ લાગી ગઈ હતી. હાલ સમગ્ર ઘટનાને લઈને વધુ તપાસ હાથ ધરવામાં આવી છે.