બનાસકાંઠામાં સાંસદ ગેનીબેનના નિવેદનથી વિવાદ, ભુવાએ Videoમાં નામ લીધા વગર આપ્યો પડકાર

બનાસકાંઠાના સાંસદ ગેનીબેન ઠાકોરે તાજેતરમાં ભુવાઓ ઉપર વિશ્વાસ ન કરવા માટે આપેલા નિવેદનથી વિવાદ સર્જાયો છે. ગેનીબેન ઠાકોરના આ નિવેદનને પગલે સ્થાનિક ધાર્મિક વર્તુળોમાં નારાજગી જોવા મળી રહી છે. આ વિવાદ વચ્ચે, હવે એક ભુવાનો વીડિયો સોશિયલ મીડિયા પર વાયરલ થયો છે. આ ભુવાએ જાહેરમાં વીડિયો મારફતે સાંસદ ગેનીબેન ઠાકોરનું નામ લીધા વગર તેમના નિવેદન ઉપર આકરા પ્રહારો કર્યા છે અને તેમને ખુલ્લો પડકાર ફેંક્યો છે.

ભુવાના વીડિયોમાં શું કહેવાયું?

વીડિયોમાં ભુવાએ ધાર્મિક શ્રદ્ધા અને આસ્થા પર ટિપ્પણી કરવા બદલ નારાજગી વ્યક્ત કરી છે. જોકે તેમણે સાંસદનું સીધું નામ નથી લીધું, પણ તેમના નિવેદન પર પ્રહાર કરતા કહ્યું છે કે લોકોની આસ્થાને ઠેસ પહોંચાડવી યોગ્ય નથી. આ વીડિયો હવે સોશિયલ મીડિયામાં વાયરલ થઈ રહ્યો છે અને બનાસકાંઠાના રાજકારણમાં અને ધાર્મિક સમુદાયમાં ચર્ચાનો વિષય બન્યો છે.

આ વિવાદથી રાજકીય વર્તુળોમાં ગરમાવો આવ્યો છે, જ્યાં એક તરફ સાંસદ વૈજ્ઞાનિક દ્રષ્ટિકોણ અપનાવવાની વાત કરી રહ્યા છે, તો બીજી તરફ પરંપરાગત આસ્થાના વાહકોએ આ નિવેદન સામે સખત વિરોધ નોંધાવ્યો છે.