VIDEO: બનાસકાંઠાના ઉણ ગામમાં હિંસક અથડામણ બાદ ટોળાં સામે ગુનો દાખલ, સ્થિતિ હાલ કાબૂમાં, અફવાથી દૂર રહેવા તંત્રની અપીલ
છેલ્લું અપડેટ : 19 Mar 2026
VIDEO: બનાસકાંઠા જિલ્લાના ભાભર અને ઉણ ગામમાં પ્રેમલગ્નના વિવાદે ઉગ્ર સ્વરૂપ ધારણ કરતા બે જ્ઞાતિઓ વચ્ચે હિંસક સંઘર્ષ સર્જાયો હતો. આ ઘટનામાં ઉશ્કેરાયેલા ટોળાએ પથ્થરમારો, વાહનોમાં તોડફોડ અને હાઈવે ચક્કાજામ કરતા સમગ્ર પંથકમાં અજંપાભરી શાંતિ છવાઈ ગઈ છે. જિલ્લા પોલીસ વડા (SP) પ્રશાંત સુંબેએ આ મામલે કડક કાર્યવાહીના સંકેત આપ્યા છે.
ઘટનાની પૃષ્ઠભૂમિ
વાવ-થરાદ પંથકની એક યુવતીના પ્રેમલગ્ન બાદ સામાજિક રોષ જોવા મળ્યો હતો. રુણી ગામમાં યોજાયેલા મહાસંમેલન બાદ મોટી સંખ્યામાં લોકોનું ટોળું ઉણ ગામ તરફ ધસી ગયું હતું. આ દરમિયાન પરિસ્થિતિ વણસી હતી અને ટોળાએ કાયદો હાથમાં લીધો હતો. પોલીસના જણાવ્યા અનુસાર, ટોળું અત્યંત આક્રમક હતું અને સમજાવટ છતાં પથ્થરમારો શરૂ કર્યો હતો, જેમાં 4થી 5 પોલીસ જવાનો પણ ઈજાગ્રસ્ત થયા છે.
પોલીસની કડક કાર્યવાહી
સ્થિતિને કાબૂમાં લેવા માટે પોલીસે લાઠીચાર્જ અને ટિયરગૅસના શેલ છોડવાની ફરજ પડી હતી. બનાસકાંઠા SPએ સ્પષ્ટ કર્યું છે કે:
FIR અને આરોપીઓ: 16 નામજોગ આરોપીઓ સહિત આશરે 1000 લોકોનાં ટોળાં સામે રાયોટિંગ અને 'એટેમ્પ્ટ ટુ મર્ડર' (હત્યાનો પ્રયાસ) જેવી ગંભીર કલમો હેઠળ ગુનો નોંધવામાં આવ્યો છે.
ધરપકડ: અત્યાર સુધીમાં 4 મુખ્ય આરોપીઓની અટકાયત કરવામાં આવી છે, જ્યારે અન્યને ઝડપવા LCB સહિતની 4 ટીમો કાર્યરત છે.
ચુસ્ત બંદોબસ્ત: ઉણ ગામમાં હાલ 200થી વધુ પોલીસ જવાનો તૈનાત છે અને સતત પેટ્રોલિંગ કરવામાં આવી રહ્યું છે.
શાંતિની અપીલ
પોલીસ દ્વારા વિવિધ ગામોમાં શાંતિ સમિતિની બેઠકો યોજવામાં આવી રહી છે. SP પ્રશાંત સુંબેએ સોશિયલ મીડિયા કે અન્ય માધ્યમો દ્વારા ફેલાતી અફવાઓથી દૂર રહેવા અને કાયદો હાથમાં ન લેવા જાહેર જનતાને નમ્ર અપીલ કરી છે. હાલમાં સ્થિતિ સંપૂર્ણપણે નિયંત્રણ હેઠળ છે.
