Video: દિવાળીની રાત્રે રમાતું ૬૦ વર્ષ જૂનું અનોખું 'ઈંગોરિયાનું યુદ્ધ'!

સાવરકુંડલાનું વિશ્વપ્રસિદ્ધ યુદ્ધ

દિવાળીની રાત્રે રમાતું ૬૦ વર્ષ જૂનું અનોખું 'ઈંગોરિયાનું યુદ્ધ'!

એકબીજા સામે ઈંગોરિયા ફેંકતા યુવાનો, આકાશમાં સર્જાતો યુદ્ધ જેવો માહોલ!

અમરેલી જિલ્લાનું સાવરકુંડલા શહેર માત્ર વજન કાંટાના ઉત્પાદન માટે જ નહીં, પરંતુ દિવાળીની રાત્રે રમાતા અદભુત અને રોમાંચક ઈંગોરિયાના યુદ્ધ માટે સમગ્ર વિશ્વમાં આગવી ઓળખ ધરાવે છે. છેલ્લા ૬૦ વર્ષથી ચાલી આવતી આ રમત હેઠળ દિવાળીની રાત્રે ૧૦ વાગ્યાથી શરૂ થઈને રાત્રે ૧ વાગ્યા સુધી હજારોની સંખ્યામાં ઈંગોરિયા કે કોકડાઓ એકબીજાની સામે ફેંકવામાં આવે છે. અગાઉ ઈંગોરિયાનું વૃક્ષ ઉપલબ્ધ હતું, પરંતુ સમય જતાં વૃક્ષો લુપ્ત થતાં હવે કોકડાના માધ્યમથી આ રમત અકબંધ જળવાઈ રહી છે. પ્રથમ દ્રષ્ટિએ આ રમતને જોતા એવું પ્રતીત થાય છે કે જાણે બે દેશો વચ્ચે મિસાઈલ છોડાતી હોય અને યુદ્ધ ખેલાતું હોય. સાવરકુંડલાના દેવડા ગેટ વિસ્તારમાં રમાતી આ બે કલાકની રમતમાં બેથી અઢી લાખ જેટલા હર્બલ અને હાથબનાવટના ઈંગોરિયા ફોડી નાખવામાં આવે છે. આ સંપૂર્ણપણે નિર્દોષ અને જ્ઞાતિ-જાતિના ભેદભાવ વિના રમાતી રમતનો ઉત્સાહ રમતવીરો પ્રવીણભાઈ ચોટીલા અને મિતેશ જેઠવા જેવા ખેલાડીઓમાં સ્પષ્ટ જોવા મળે છે, જેઓ આ પરંપરાને જીવંત રાખવા માટે ઉત્સાહપૂર્વક ભાગ લે છે.

ગૃહ ઉદ્યોગ તરીકે વિકસેલા આ ઈંગોરિયાએ સાવરકુંડલાને આપી છે વૈશ્વિક ઓળખ!

આ ભવ્ય અને રોમાંચક રમતને નિહાળવા માટે માત્ર સ્થાનિક લોકો જ નહીં, પરંતુ દૂર-દૂરથી અને વિદેશોથી પણ પ્રવાસીઓ સાવરકુંડલા પહોંચે છે. આ વર્ષે આ રમતનો આનંદ માણવા માટે સાવરકુંડલાના ધારાસભ્ય મહેશ કસવાલા પણ વિશેષ ઉપસ્થિત રહ્યા હતા. એટલું જ નહીં, અમરેલી કલેક્ટર વિકલ્પ ભારદ્વાજે પણ ખુદ આ રમતમાં ભાગ લઈને અનોખો રોમાંચ અનુભવ્યો હતો અને જણાવ્યું હતું કે જીવનમાં પ્રથમવાર આવી અદ્ભુત રમત જોઈ છે, જે અન્યત્ર ક્યાંય જોવા મળતી નથી. કલેક્ટરે આ રમતના રમતવીરોને ખુલ્લા મને બિરદાવ્યા હતા. આ રમત સાથે સ્થાનિક સ્તરે રોજગારી પણ જોડાયેલી છે, કારણ કે ઈંગોરિયા બનાવવાનો ગૃહ ઉદ્યોગ અહીંના ગ્રામીણ અને શહેરી વિસ્તારોમાં ફ્લરીશ થઈ રહ્યો છે. અહીં બનેલા ઈંગોરિયાઓ હવે રાજ્યમંત્રી કૌશિકભાઈ વેકરીયા અને ધારાસભ્ય મહેશભાઈ કસવાલાના ગામો સુધી પણ પહોંચી રહ્યા છે. સાવરકુંડલાના યુવાનો દ્વારા જાળવવામાં આવતી આ હર્બલ અને પરંપરાગત ફટાકડા વગરની રમત પર્યાવરણને નુકસાન પહોંચાડ્યા વગર ખુશીઓ વહેંચવાનું શ્રેષ્ઠ માધ્યમ બની છે.

સાવરકુંડલાની આ અનોખી ઇંગોરિયાની લડાઈએ સાબિત કરી દીધું છે કે કેવી રીતે વર્ષો જૂની સાંસ્કૃતિક પરંપરાઓ આજના આધુનિક યુગમાં પણ પોતાની આગવી ઓળખ અને ભાઈચારો જાળવી શકે છે. આ રમત હવે માત્ર સાવરકુંડલાનો ઉત્સવ નથી રહ્યો, પરંતુ તે સમગ્ર ગુજરાત અને દેશનું એક આકર્ષક સાંસ્કૃતિક પર્વ બની ચૂક્યું છે.

બ્યૂરો રિપોર્ટ જીએસટીવી