200 કરોડની જમીનનો વિવાદઃ ભાજપના MLA રમેશ ટીલાળા સામે સગી બહેનના ચોંકાવનારા આક્ષેપ
શાપરમાં આવેલી 200 કરોડની જમીન રાજકોટ ભાજપના ધારાસભ્ય રમેશ ટીલાળા અને તેમના મોટાભ
શાપરમાં આવેલી 200 કરોડની જમીન રાજકોટ ભાજપના ધારાસભ્ય રમેશ ટીલાળા અને તેમના મોટાભાઈ મગનભાઈ સહિતનાઓ હડપ કરવા માગતા હોવાનો આક્ષેપ ખુદ તેમના જ બહેન દયાબેન ઉંધાડે કર્યો છે. જેને કારણે ગઈકાલે શાપર પોલીસે પોતાને કોઈપણ ગુના વગર કલાકો સુધી બેસાડી રાખ્યાનો પણ આક્ષેપ કર્યો છે. જોકે પોલીસે આ આક્ષેપોને નકારી કાઢ્યા છે.
ખોટી સહીઓ કરી હોવાનો આરોપ
ધારાસભ્ય ટીલાળાના ભાણેજ ચેતન ઉંધાડે જણાવ્યું કે, શાપરમાં આશરે 200 કરોડ રુપિયાની વડીલોપાર્જીત જમીન છે. જે જમીન અંગે કોર્ટમાં કેસ ચાલે છે. આ જમીન હડપ કરવા તેના મામા રમેશભાઈ ટીલાળા, મોટા મામા મગનભાઈ અને તેનો પુત્ર પ્રકાશ સહિતનાઓ પ્રયાસો કરી રહ્યા છે. એટલું જ નહીં આ માટે તેની માતા દયાબેન અને માસી કિરણબેન સુદાણીની ખોટી સહિઓ પણ કરવામાં આવ્યાનો આક્ષેપ કર્યો હતો, જો કે આ બોગસ સહીઓ કોણે કરી તે વિશે અજાણ હોવાનું કહ્યું હતું.
પોલીસે પણ આપ્યો માનસિક ત્રાસ
સાથોસાથ ઉમેર્યું કે ગઈકાલે તેમના માતા દયાબેન તે જમીન ખાતે શાપર ગયા હતા, ત્યારે તેમના મોટા મામા મગનભાઈ પણ ત્યાં પહોંચી ગયા હતા. જેણે તેની માતાને ગાળો દઈ કહ્યું હતું કે આ જગ્યા તમારી નથી, ભીખ માંગવી હોય તો રોડ ઉપર જતા રહો, તમે આ જમીનમાંથી નીકળી જાવ, અહીં ભીખ મળશે નહીં. ત્યાર પછી શાપર પોલીસને જાણ કરી હતી. જેથી તેનો સ્ટાફ આવી તેની માતા દયાબેનને પોલીસ સ્ટેશને લઈ ગયો હતો. જ્યાં સવારે 10.30 વાગ્યાથી રાત્રે નવેક વાગ્યા સુધી કોઈપણ ગુના વગર બેસાડી રાખ્યા હતા.
દોઢ કરોડ લઈને ચૂપ રહેવા ધમકાવ્યા
વધુમાં ચેતનભાઈએ આક્ષેપ કર્યો હતો કે, શાપર પોલીસ તેના મામા રમેશભાઈ કહે એટલું જ કરે છે, અમારી કોઈ ફરિયાદો નોંધતી નથી. ગઈકાલે રાત્રે શાપર પોલીસ મથકમાં હાજર પોલીસમેનોએ તેમની માતા દયાબેનને સામાવાળા જ્યાં કહે ત્યાં સહી કરી દેવા અને દોઢ કરોડ લઈ લેવા ધમકાવ્યા હતા.
