આવતીકાલે ગુજરાતને મહેસાણા–બેચરાજી–સાબરમતી સહિત બે ટ્રેનોની મળશે ભેટ, વીડિયો કૉન્ફરન્સિંગના માધ્યમથી PM મોદી બતાવશે લીલી ઝંડી

ગુજરાતના રેલવે મુસાફરો માટે સારા સમાચાર સામે આવ્યા છે. રાજ્યને બે નવી રેલ સેવાઓની ભેટ મળવા જઈ રહી છે. પ્રધાનમંત્રી નરેન્દ્ર મોદી 30 ઑક્ટોબરે વીડિયો કૉન્ફરન્સિંગના માધ્યમથી સાબરમતી–વારાણસી એક્સપ્રેસ અને મહેસાણા–બેચરાજી–સાબરમતી મેમૂ ટ્રેનને લીલી ઝંડી બતાવી પ્રારંભ કરાવશે. આ બંને સેવાઓ શરૂ થવાથી ગુજરાતમાં રેલ કનેક્ટિવિટી વધુ મજબૂત બનશે અને મુસાફરોને મુસાફરીમાં સુવિધા મળશે.

સાબરમતીથી વારાણસી વચ્ચે દૈનિક એક્સપ્રેસ ટ્રેન

સાબરમતીથી વારાણસી વચ્ચે દૈનિક એક્સપ્રેસ ટ્રેન શરૂ થવાથી ગુજરાત અને ઉત્તર પ્રદેશ વચ્ચેની રેલ કનેક્ટિવિટીને વેગ મળશે. ખાસ કરીને વારાણસીના કાશી વિશ્વનાથ ધામમાં દર્શન કરવા જતા શ્રદ્ધાળુઓ માટે આ ટ્રેન ઉપયોગી સાબિત થશે. આ ઉપરાંત ગુજરાત, રાજસ્થાન અને ઉત્તર પ્રદેશ વચ્ચેની મુસાફરી પણ વધુ સુગમ બનવાની આશા છે.

મહેસાણા–બેચરાજી–સાબરમતી વચ્ચે મેમૂ સેવા

બીજી તરફ, મહેસાણા–બેચરાજી–સાબરમતી મેમૂ ટ્રેન સેવા શરૂ થવાથી ઉત્તર ગુજરાતના મુસાફરોને મોટી રાહત મળશે. મહેસાણા, બેચરાજી અને સાબરમતી વચ્ચે દરરોજ અવરજવર કરતા મુસાફરો, વિદ્યાર્થીઓ અને નોકરીયાતો માટે મુસાફરી વધુ સરળ બનશે. બેચરાજીમાં આવેલા પ્રસિદ્ધ બહુચર માતાના દર્શને જતા શ્રદ્ધાળુઓને પણ આ રેલ સેવા લાભદાયી બની શકે છે.

બંને નવી રેલ સેવાઓના પ્રારંભથી ઉત્તર ગુજરાતના પરિવહનને વેગ મળવાની સાથે ધાર્મિક પ્રવાસન અને આંતરરાજ્ય મુસાફરીને પણ પ્રોત્સાહન મળશે. જોકે, ટ્રેનોના સમયપત્રક, સ્ટોપેજ અને ભાડા અંગેની વિગતો માટે રેલવેની સત્તાવાર જાહેરાત જોવી જરૂરી રહેશે.