જયરાજસિંહ જાડેજાના પુત્ર ગણેશ દ્વારા દલિત યુવકનું અપહરણ અને માર મારવાના કેસમાં 3ની ધરપકડ

Junagadh news : ગોંડલના પૂર્વ ભાજપ ધારાસભ્ય જયરાજસિંહ જાડેજા તેમજ વર્તમાન ભાજપ ધારાસભ્ય ગીતાબા જયરાજસિંહ જાડેજાના પુત્ર ગણેશે જુનાગઢમાં પોતાના સાગરીતો સાથે દલિત યુવક સંજય રાજુભાઈ સોલંકીનું કારમાં અપહરણ કરી નગ્ન કરી માર માર્યો હતો. આ કેસમાં ભોગ બનાનર દલિત યુવક સંજય સોલંકીના નિવેદનને આધારે જુનાગઢ એ ડિવિઝન પોલીસે ગણેશ ગોંડલ સહિત તમામ 11 આરોપીઓ સામે IPC કલમની વિવિધ કલમો, આર્મ્સ એક્ટ તેમજ એટ્રોસીટી  હેઠળ ગુનો નોંધ્યો હતો. હવે જુનાગઢ LCBએ આ કેસમાં સંડોવાયેલા 3 આરોપીઓની ધરપકડ કરી છે. 

કાર ચલાવનાર સહિત 3 આરોપીઓની ધરપકડ

જુનાગઢ LCBએ આ કેસમાં બ્રેઝા કાર ચલાવનાર સહિત 3 આરોપીઓની ધરપકડ કરી છે. પોલીસે મૂળ ઉત્તરપ્રદેશના વાતની અને જસદણમાં રહેતા અતુલ કઠેરીયા તેમજ જસદણમાં રહેતા ફેઝલ ઉર્ફે પાવલી અને ઇકબાલની ધરપકડ કરી છે.  ધરપકડ કરવમાં આવેલા ત્રણેય આરોપીઓએ ગુનહાની કબૂલાત કરી છે. ગુન્હા સમયે અતુલ કઠેરીયા  કાર ચલાવતો હતો તેમજ અન્ય બે ગુન્હામાં સામેલ હતા. 

ગણેશ ગોંડલ ભૂગર્ભમાં 

જુનાગઢ NSUIના શહેર પ્રમુખ દલિત યુવક સંજય રાજુભાઈ સોલંકીનું અપહરણ કરીને નગ્ન કરીને માર મારવાના કેસમાં મુખ્ય આરોપી ગણેશ ગોંડલ હાલ ભૂગર્ભમાં ઉતરી ગયો છે. આ મામલે સવાલો ઉઠી રહ્યા છે કે ગણેશ ગોંડલ સાથે ગુન્હામાં રહેલા આરોપીઓ પકડાયા છે તો પોલીસ તેને કેમ પકડી રહી નથી. 

તમામ આરોપીઓ સામે ગુજસીટોક અંતર્ગત કાર્યવાહી કરવા માંગ 

આ ગુનો આચરનાર તમામ આરોપીઓ વિરુદ્ધ ગુનાહિત કાવતરું રચવું અને ગુજસીટોકનો ઉમેરો કરી તાત્કાલિક આરોપીઓને પકડવા માંગ કરવામાં આવી છે. જ્યારે  બનનારના દલિત યુવકના પિતા રાજુભાઈ સોલંકીએ ચીમકી આપી છે કે જો ગુરૂવાર સુધી આરોપીઓ નહીં પકડાય તો તેઓ પરિવાર સાથે કાળવા ચોક આંબેડકરના પૂતળા પાસે આત્મવિલોપન કરશે.

અહીં વાંચો શું બની હતી સમગ્ર ઘટના : જયરાજસિંહ જાડેજાના પુત્ર ગણેશ ગોંડલ તથા 10 શખ્સો પર નોંધાઈ દલિત યુવકના અપહરણ અને માર મારવાની ફરિયાદ