VIDEO: Tech/ 20 વર્ષના વિદ્યાર્થીએ ભવિષ્યનો સચોટ અંદાજ આપતું AI બનાવ્યું, આ અનોખી શોધથી દુનિયા દંગ!
છેલ્લું અપડેટ : 31 Mar 2026
GitHub પર આજકાલ એક 20 વર્ષનો ચીની સ્ટુડન્ટ છવાયેલો છે. ગૂગલ અને માઈક્રોસોફ્ટ જેવા દિગ્ગજોને પાછળ છોડીને 20 વર્ષના ચીની વિદ્યાર્થી ગુઓ હાંગજિયાંગે ભવિષ્ય જણાવતું AI બનાવી લીધું છે. આ જ કારણ છે કે હાલમાં તે દુનિયાનો નંબર 1 ડેવલપર બની ગયો છે. બીજિંગ યુનિવર્સિટીમાં અભ્યાસ કરતા ગુઓએ માત્ર 10 દિવસમાં MiroFish નામનું AI એન્જિન તૈયાર કર્યું છે.
આ કોઈ સામાન્ય ચેટબોટ નથી પરંતુ ભવિષ્ય જણાવતો ચેટબોટ છે. આ ચેટબોટની ખાસિયત એ છે કે તે આપણા સમાજનું એક આર્ટિફિશિયલ મોડેલ બનાવીને શક્યતાઓના આધારે ભવિષ્ય જણાવે છે. તે 10 લાખ AI એજન્ટ્સની આખી સોસાયટી બનાવી શકે છે અને તેમના વર્તનથી નીકળતા પરિણામોના આધારે જણાવી શકે છે કે અસલી દુનિયામાં શું થઈ શકે છે.
4.1 મિલિયન ડોલરનું મળ્યું ફંડિંગ
ગુઓ હાંગજિયાંગના AI ચેટબોટ પાછળ 'વાઈબ કોડિંગ' નામની ટેકનોલોજી છે. જેમાં AIની મદદથી ઝડપથી કોડિંગ કરવામાં આવે છે. તેમને આ પરાક્રમ માટે ચીનના ભૂતપૂર્વ સૌથી અમીર વ્યક્તિ ચેન તિયાનકિયાઓ તરફથી માત્ર 24 કલાકમાં જ 4.1 મિલિયન ડોલર (લગભગ 34 કરોડ રૂપિયા)નું ફંડિંગ મળી ચૂક્યું છે.
નોંધનીય છે કે તેમના ચેટબોટનું પાછલું વર્ઝન 'BettaFish' જૂની ઘટનાઓનું વિશ્લેષણ કરતું હતું, પરંતુ આ નવી સિસ્ટમ ભવિષ્યનો અંદાજ લગાવે છે.
કેવી રીતે કામ કરે છે ભવિષ્ય જણાવતું AI?
MiroFish એક OASIS નામના એન્જિન પર કામ કરે છે. આમાં રહેલા AI એજન્ટ્સનું પોતાનું વ્યક્તિત્વ અને યાદશક્તિ હોય છે. તે કોઈ ચોક્કસ પરિસ્થિતિને એજન્ટ્સ દ્વારા વર્ચ્યુઅલ સમાજમાં ઊભી કરે છે અને જુએ છે કે AI એજન્ટ્સ કેવું વર્તન કરે છે. આને તમે કીડીઓની વસાહત (colony)ની જેમ સમજી શકો છો. તે 'વર્ચ્યુઅલ સિવિક્સ'ના નિયમો પર આધારિત છે, જેનાથી એ સમજવું સરળ બને છે કે કોઈ નવા સમાચાર કે નીતિ સમાજમાં કેવા પ્રકારની પ્રતિક્રિયા આપશે.
AIની ભવિષ્યવાણીમાં કેટલો દમ?
આ AI એ પોતાની તાકાત બે ઉદાહરણો દ્વારા સાબિત કરી છે:
એક યુનિવર્સિટીના વિવાદમાં તેણે બિલકુલ સચોટ અનુમાન લગાવ્યું કે લોકોનો ગુસ્સો ક્યારે અને કેવી રીતે બદલાશે.
તેણે પ્રખ્યાત નવલકથા 'ડ્રીમ ઓફ ધ રેડ ચેમ્બર'નો એવો અંત લખી દીધો જે સદીઓ પહેલા ખોવાઈ ગયો હતો.
જોકે, એવું નથી કે તેની કોઈ મર્યાદા નથી. આના પર સિમ્યુલેશન ચલાવવું ઘણું મોંઘું છે અને ડિજિટલ માણસ તરીકે કામ કરતા AI એજન્ટ્સ ક્યારેક અસલી માણસો કરતાં વધુ આક્રમક વર્તન કરે છે. તેમ છતાં, આ ટેકનોલોજી જોઈને નિષ્ણાતો માની રહ્યા છે કે ચીનના હાથમાં ભવિષ્ય જણાવનારી લાકડી આવી ગઈ છે.
