ફ્રાન્સ/ સાયબર હુમલો કરી ફ્રીઝનું તાપમાન 50 ડિગ્રી સુધી વધાર્યું, 350 સુપરમાર્કેટ્સમાં આગ

France Cyber Attack: ફ્રાન્સમાં એક વિચિત્ર સાયબર હુમલાની ઘટનાએ દુનિયાભરમાં ચિંતા વધારી છે. સામાન્ય રીતે હેકર્સ ગ્રાહકોનો ડેટા, બેન્કિંગ સિસ્ટમ અથવા કંપનીઓની માહિતી ચોરીને સાયબર હુમલા કરતા હોય છે, પરંતુ ફ્રાન્સમાં ઇન્ટરનેટ સાથે જોડાયેલી રેફ્રિજરેશન સિસ્ટમ્સને નિશાન બનાવવામાં આવી હોવાનો અહેવાલ છે. હેકર્સે સુપરમાર્કેટ્સમાં લગાવેલા રેફ્રિજરેટર અને ફ્રીઝરના તાપમાનમાં ફેરફાર કરીને તેને 50 ડિગ્રી સુધી પહોંચાડ્યું હતું. તેના કારણે ખાદ્ય પદાર્થો બગડ્યા અને અનેક સ્ટોર્સને ભારે આર્થિક નુકસાન થયું હોવાના અહેવાલ છે. આ હુમલાની જવાબદારી હજુ સુધી કોઈએ સ્વીકારી નથી.

700 જેટલા સુપરમાર્કેટ્સ પર હુમલાનો અહેવાલ

ફ્રેન્ચ તપાસકર્તાઓએ મંગળવારે જણાવ્યું હતું કે આ સાયબર હુમલામાં મોટી સંખ્યામાં સુપરમાર્કેટ્સની રેફ્રિજરેશન સિસ્ટમ્સને અસર થઈ હતી. અહેવાલો અનુસાર, આશરે 700 સુપરમાર્કેટ્સને નિશાન બનાવવામાં આવ્યાં હતાં. જોકે, આ ઘટનાથી ખાદ્ય સુરક્ષાને લગતું કોઈ વ્યાપક જોખમ ઊભું થયું હોવાની પુષ્ટિ કરવામાં આવી નથી. તપાસકર્તાઓ માટે સૌથી મોટો સવાલ એ છે કે હુમલામાં કોઈ ખંડણી માગવામાં આવી નથી. સામાન્ય રીતે સાયબર ગુનેગારો નાણાં પડાવવા માટે સિસ્ટમ હેક કરતા હોય છે, પરંતુ આ ઘટનામાં હુમલાનો હેતુ સ્પષ્ટ થયો નથી.

350 મૉલ-માર્કેટમાં આગ લાગ્યાનો દાવો

આ ઘટનાને લગતા અહેવાલોમાં આશરે 350 સુપરમાર્કેટ્સ અને મૉલમાં આગ લાગ્યાનો દાવો કરવામાં આવ્યો છે. જોકે, આગની ઘટનાઓ અને રેફ્રિજરેશન સિસ્ટમમાં થયેલી ગરબડ વચ્ચેનો સંબંધ સ્વતંત્ર રીતે સ્પષ્ટ થવો જરૂરી છે. ફ્રાન્સના વડાપ્રધાન સેબેસ્ટિયન લેકોર્નુએ રાષ્ટ્રીય સાયબર સુરક્ષા એજન્સીને તપાસના નિર્દેશ આપ્યા છે. રેફ્રિજરેટર અને ફ્રીઝરમાં રાખવામાં આવેલા ખાદ્ય પદાર્થો નિર્ધારિત તાપમાનથી બહાર જતાં આરોગ્ય સંબંધિત જોખમ ઊભું થઈ શકે છે. તેથી અસરગ્રસ્ત સ્ટોર્સે શંકાસ્પદ ખાદ્ય પદાર્થોનો નિકાલ કરવો પડ્યો હોવાનું જણાવાયું છે.

ઇન્ટરમાર્શ અને કૈરેફોર સહિતની કંપનીઓને નુકસાન

ફ્રાન્સના મુખ્ય રિટેલ જૂથ લે મસ્કેટિયર્સના જણાવ્યા અનુસાર, તેની ઇન્ટરમાર્શ બ્રાન્ડના આશરે 150 સ્ટોર્સમાં રેફ્રિજરેશન યુનિટ્સને અસર થઈ હતી. અહેવાલ પ્રમાણે, કેટલાક યુનિટ્સનું તાપમાન રાત્રિના સમયે સતત છ કલાક સુધી 50 ડિગ્રી સુધી પહોંચ્યું હતું. કૈરેફોરના આશરે 80 સુપરમાર્કેટ્સ પણ અસરગ્રસ્ત હોવાનું કહેવાય છે. મોનોપ્રિક્સના કેટલાક સ્ટોર્સમાં પણ સમસ્યાઓ સામે આવી હતી. ખાદ્ય પદાર્થોનો નિકાલ કરવો પડતાં કંપનીઓને લાખો રૂપિયાનું નુકસાન થયું હોવાનો અંદાજ છે.

જૂના સોફ્ટવેરની ખામીનો લાભ ઉઠાવ્યાની આશંકા

ફ્રાન્સની સાયબર સુરક્ષા એજન્સીના અહેવાલ મુજબ, હેકર્સે ડેનિશ કંપની ડેનફોસ દ્વારા સ્થાપિત રેફ્રિજરેશન કંટ્રોલરની જૂની અને આઉટડેટેડ (Outdated) સોફ્ટવેર સિસ્ટમની ખામીઓનો લાભ લીધો હોવાની આશંકા છે. ઇન્ટરનેટના માધ્યમથી રિમોટલી (Remotely) સિસ્ટમ સુધી પહોંચ મેળવી તાપમાનમાં ફેરફાર કરવામાં આવ્યો હોવાની તપાસ ચાલી રહી છે.

સાયબર થ્રેટ ઇન્ટેલિજન્સ ક્ષેત્રના નિષ્ણાતોએ સ્પેન, પોર્ટુગલ, પોલેન્ડ, જર્મની અને બેલ્જિયમમાં પણ આવા હુમલાના જોખમ અંગે ચેતવણી આપી છે. નિષ્ણાતોના મતે, ઇન્ટરનેટ સાથે જોડાયેલા ઉપકરણોમાં સમયસર સોફ્ટવેર અપડેટ અને સુરક્ષા વ્યવસ્થા જાળવવી અત્યંત જરૂરી છે.

નેધરલેન્ડમાં પણ સુરક્ષાને લઈને ચિંતા

દરમિયાન, નેધરલેન્ડની સૌથી મોટી સુપરમાર્કેટ ચેઇન અહોલ્ડ ડેલહાઈઝે તેના નેટવર્કમાં સુરક્ષા સંબંધિત સમસ્યાઓને કારણે હોમ ડિલિવરી એપ બંધ કરી હોવાના અહેવાલ છે. આ ઉપરાંત, ઓગસ્ટના અંતમાં અમેરિકન સૈન્ય બેઝમાં પણ રેફ્રિજરેશન સંબંધિત સમસ્યાઓ સામે આવી હતી. આ ઘટનાઓને પગલે ઇન્ટરનેટ સાથે જોડાયેલી ઔદ્યોગિક અને વ્યાપારી સિસ્ટમ્સની સુરક્ષા અંગે નવા સવાલો ઊભા થયા છે.