VIDEO: અમીરગઢમાં બનાસ નદીના ધસમસતા પાણીમાં ફસાયો યુવક, 16 કલાક બાદ કરાયું રેસ્ક્યુ

બનાસકાંઠા જિલ્લાના અમીરગઢ નજીક બનાસ નદીમાં ફસાયેલા યુવક ભાણાભાઈ બનાભાઈ ડાભીને SDRFની ટીમે સફળતાપૂર્વક બચાવી લીધો છે. આ યુવક 16 કલાક સુધી ધસમસતા પાણીના પ્રવાહમાં જિંદગી અને મોત વચ્ચે ઝૂલતો રહ્યો હતો. ખુણીયા ગામના આ યુવકના બચાવ માટે ગામના લોકો આખી રાત નદીકિનારે હૈયાધારણ આપવા બેઠા હતા, પરંતુ અંધારાને કારણે રેસ્ક્યૂ ઓપરેશન શક્ય ન બન્યું. 

સવારે SDRFની ટીમે ભારે જોખમ વચ્ચે રેસ્ક્યૂ ઓપરેશન હાથ ધર્યું. ટીમનો એક સભ્ય પાણીના પ્રવાહમાં વહીને સવાણીયા ગામ પાસે પહોંચી ગયો હતો, છતાં ટીમે હિંમત ન હારી. અંતે, યુવકને સુરક્ષિત બહાર કાઢવામાં આવ્યો અને સારવાર માટે સરકારી દવાખાને ખસેડાયો. ઘટનાસ્થળે એકઠા થયેલા સ્થાનિક લોકોએ SDRFની ટીમની કામગીરીને બિરદાવી અને રાહતનો શ્વાસ લીધો. આ ઘટના દરમિયાન નદીના ધસમસતા પ્રવાહે રેસ્ક્યૂ કામગીરીને પડકારજનક બનાવી હતી, પરંતુ SDRFની હિંમત અને કૌશલ્યથી યુવકનો જીવ બચાવી શકાયો.