VIDEO: ભારે વરસાદના કારણે શેત્રુંજી નદીમાં પૂર, નીચાણવાળા વિસ્તારોને અપાઈ સાવચેત રહેવાની સૂચના

ગુજરાતના વિવિધ જિલ્લાઓમાં વરસાદનો બીજો રાઉન્ડ શરૂ થઈ ગયો છે. સૌરાષ્ટ્ર, મધ્ય ગુજરાતમાં ભારે વરસાદથી નદી, જળાશયોમાં નવા નીરની ાવક થઈ છે. અમરેલી જિલ્લાની જીવાદોરી ગણાતી શેત્રુંજી નદીમાં ભારે પાણીની આવક થતાં ખેડૂતોમાં ખુશીની લહેર વ્યાપી ગઈ છે. શનિવારે ઉપરવાસમાં થયેલા ભારે વરસાદના કારણે નદીમાં પૂર જેવી સ્થિતિ સર્જાઈ છે.

ધારી અને અમરેલીમાં મેઘમહેર

શનિવારે ધારી, અમરેલી સહિતના તાલુકામાં ભારે વરસાદ નોંધાયો હતો, જેના પરિણામે શેત્રુંજી નદીમાં પાણીની આવક શરૂ થઈ છે. લાંબા સમયથી ખાલી રહેલી નદીમાં પાણી આવતાં ખેડૂતોને સિંચાઈ માટે પૂરતું પાણી મળી રહેશે તેવી આશા જાગી છે.

શેત્રુંજી નદીમાં પૂર

સાવરકુંડલાના જૂના સાવર ગામ નજીકથી પસાર થતી શેત્રુંજી નદીમાં પૂર આવ્યું છે. શનિવારના વરસાદના કારણે પાણીનો પ્રવાહ જૂના સાવર સુધી પહોંચી ગયો છે, જેના વીડિયો સોશિયલ મીડિયા પર વાયરલ થઈ રહ્યા છે. નદીનું પાણી ખેતરો અને નીચાણવાળા વિસ્તારોમાં પ્રવેશી રહ્યું છે, જેના કારણે તંત્ર દ્વારા સ્થાનિક લોકોને સાવચેત રહેવાની અપીલ કરવામાં આવી છે.