VIDEO / ILT20માં ડ્રામા, રન આઉટ થયા બાદ પણ ટોમ કરનને પાછો બોલાવવામાં આવ્યો, જાણો આખો મામલો

અબુ ધાબીમાં રમાઈ રહેલી ILT20 લીગ 2025માં ગલ્ફ જાયન્ટ્સે 25 જાન્યુઆરીના રોજ એક રોમાંચક મુકાબલામાં ડિફેન્ડિંગ ચેમ્પિયન MI અમીરાતને હરાવ્યું. જોકે, આ મેચમાં ઘણો ડ્રામા થયો હતો. પ્રથમ બેટિંગ કરતા, MI અમીરાતે 20 ઓવરમાં 6 વિકેટ ગુમાવીને 151 રન બનાવ્યા. MI તરફથી ટોમ બેન્ટન 56 રન સાથે સૌથી વધુ રન બનાવનાર ખેલાડી હતો. MIના સ્કોરના જવાબમાં, ગલ્ફ જાયન્ટ્સે 152 રનનો ટાર્ગેટ છેલ્લા બોલ પર 2 વિકેટ બાકી રહીને હાંસલ કરી લીધો. આ મેચની છેલ્લી ઓવરોમાં ઘણો ડ્રામા જોવા મળ્યો. આ ઘટના ત્યારે બની જ્યારે ગલ્ફ જાયન્ટ્સને જીતવા માટે 13 બોલમાં 18 રનની જરૂર હતી. ટોમ કરન અને માર્ક અડાયર બેટિંગ કરી રહ્યા હતા.

આ પણ વાંચો: 'ગૌતમ સર સાથે વાત...', બીજી T20માં ભારતને જીતાડ્યા બાદ તિલક વર્માએ જણાવ્યું સફળતાનું રહસ્ય

18મી ઓવરના છેલ્લા બોલ પર માર્ક અડાયર એક સિંગલ લેવા દોડ્યો છે. બંને બેટ્સમેનોએ સરળતાથી રન પૂરો કર્યો પરંતુ ટોમ કરન ઓવર પૂરી થઈ ગઈ એમ માનીને ક્રીઝ છોડીને ચાલ્યો ગયો. જોકે, બોલ હજુ પણ રમતમાં હતો. આ દરમિયાન, લોંગ-ઓફ પર ફિલ્ડિંગ કરી રહેલા કિરોન પોલાર્ડે બોલ કીપર તરફ ફેંક્યો. બોલ કીપર પૂરણ સુધી પહોંચે તે પહેલાં જ કરન ક્રીઝ છોડીને ચાલી ગયો હતો. કરન ક્રીઝ છોડીને ગયો પછી, પૂરણે બોલ હાથમાં આવતાની સાથે જ સ્ટમ્પ્સ વિખેરી નાખ્યા અને રન આઉટની અપીલ કરી. આ પછી, રિપ્લે જોવામાં આવ્યું જેમાં સ્પષ્ટપણે દેખાઈ રહ્યું હતું કે કરન રન પૂર્ણ કર્યા પછી ક્રીઝ છોડી ગયો હતો અને પછી થર્ડ અમ્પાયરે તેને આઉટ જાહેર કર્યો. ડ્રામા આ પછી શરૂ થયો.

મેદાન પર ડ્રામા

રન આઉટ થયા પછી, ટોમ કરન પવેલિયન તરફ ચાલવા લાગ્યો ત્યારે બાઉન્ડ્રીની બહાર ઊભેલા ગલ્ફ જાયન્ટ્સના કોચ એન્ડી ફ્લાવરે વિરોધ વ્યક્ત કર્યો. આ પછી તેણે કરનને મેદાનમાં રહેવાનો ઈશારો કર્યો. આ જોઈને MIના ખેલાડીઓ બિલકુલ ખુશ ન હતા, પરંતુ સમય બગાડતો જોઈને, તેમણે બેટ્સમેનને પાછા બોલાવવાનું નક્કી કર્યું. આ ઘટના પછી, માર્ક અડાયર આગામી ઓવરના પહેલા બોલ પર પવેલિયન પરત ફર્યો. ટોમ કરન પણ છેલ્લી ઓવરમાં આઉટ થયો. આમ છતાં, ગલ્ફ જાયન્ટ્સ 2 વિકેટથી મેચ જીતવામાં સફળ રહ્યું.