અમેરિકામાં 13 હજાર ફ્લાઈટ્સ પ્રભાવિત થયા બાદ પ્રતિબંધ હટ્યો, પરંતુ હવાઈ સેવાઓ સામાન્ય થતાં લાગશે સમય
અમેરિકામાં શુક્રવારે એર ટ્રાફિક કંટ્રોલની કોમ્યુનિકેશન સિસ્ટમમાં ટેકનિકલ ખામી સર્જાતાં ફ્લાઈટ્સનું સંચાલન અટકાવી દેવામાં આવ્યું હતું. જોકે, હવે આ પ્રતિબંધ હટાવી લેવામાં આવ્યો છે અને અમેરિકાનું એરસ્પેસ ફરી ખોલી દેવામાં આવ્યું છે. આ ઘટનાને કારણે અમેરિકામાં અંદાજે 13 હજાર ફ્લાઈટ્સ પ્રભાવિત થઈ હતી. અમેરિકાના પરિવહન સચિવ સીન ડફીએ જણાવ્યું હતું કે ટેકનિકલ સમસ્યાનું કારણ શોધી કાઢવામાં આવ્યું છે અને હવે હવાઈ ક્ષેત્ર ફરી ખુલ્લું મૂકવામાં આવ્યું છે.
અમેરિકાના પરિવહન સચિવે વધુમાં સ્પષ્ટ કર્યું હતું કે એરસ્પેસ ખોલવામાં આવ્યા બાદ તરત જ તમામ ફ્લાઈટ્સનું સંચાલન સામાન્ય નહીં થાય. હવાઈ સેવાઓને ધીમે ધીમે પુનઃસ્થાપિત કરવામાં આવી રહી છે અને તેમાં થોડો સમય લાગશે. તેમણે મુસાફરોને તેમની ફ્લાઈટની સ્થિતિ જાણવા સંબંધિત એરલાઈન્સનો સંપર્ક કરવાની સલાહ આપી છે.
પ્રતિબંધનું કારણ
સીન ડફીએ જણાવ્યું હતું કે બપોરે 3:36 વાગ્યે દેશભરના એર ટ્રાફિક કંટ્રોલ સેન્ટરો અને TRACONમાં રડાર તથા કોમ્યુનિકેશન સિસ્ટમમાં ખામી સામે આવી હતી. તેના કારણે રડાર મારફતે મળતા ડેટા અને વિમાનો સાથે સંપર્ક કરવામાં મુશ્કેલી સર્જાઈ રહી હતી.
આ પરિસ્થિતિને ધ્યાનમાં રાખીને સુરક્ષાના નિર્ધારિત નિયમો અનુસાર સમગ્ર દેશમાં ગ્રાઉન્ડ સ્ટોપ લાગુ કરવામાં આવ્યો હતો. એટલે કે વિમાનોને જમીન પર જ રોકી રાખવાનો આદેશ આપવામાં આવ્યો હતો. ડફીએ જણાવ્યું હતું કે તે સમયે સાડા ત્રણ હજારથી વધુ વિમાનો હવામાં ઉડાન ભરી રહ્યાં હતાં. તમામ વિમાનોએ સૂચનાઓનું પાલન કર્યું હતું અને સુરક્ષિત રીતે લેન્ડિંગ કર્યું હતું.
મળતી માહિતી અનુસાર, ત્યારબાદ એરસ્પેસમાં 400થી પણ ઓછા વિમાનો બાકી રહ્યાં હતાં. તેમણે જણાવ્યું હતું કે આ સમગ્ર સમયગાળા દરમિયાન એર ટ્રાફિક કંટ્રોલર્સ અને પાઇલટ્સે સુરક્ષાના નિર્ધારિત નિયમોનું પાલન કરીને પરિસ્થિતિને સંભાળી હતી. તેમણે સ્પષ્ટતા કરી હતી કે રડાર અને એર ટ્રાફિક કંટ્રોલ સિસ્ટમ સંપૂર્ણપણે ઠપ થઈ નહોતી.
મેડિકલ ઇમરજન્સી સહિતની જરૂરી ફ્લાઈટ્સને મંજૂરી
સીન ડફીએ જણાવ્યું હતું કે જ્યારે પણ સુરક્ષાના કારણોસર એરસ્પેસ બંધ કરવામાં આવે છે, ત્યારે મુસાફરોની સુરક્ષા અને જરૂરી સેવાઓને ધ્યાનમાં રાખીને કેટલીક ફ્લાઈટ્સને ઉડાન ભરવાની મંજૂરી આપવામાં આવે છે. આમાં મેડિકલ ઇમરજન્સી, જીવનરક્ષક દવાઓનો પુરવઠો અને કાયદા અમલીકરણ એજન્સીઓ સાથે સંકળાયેલી જરૂરી ફ્લાઈટ્સનો સમાવેશ થાય છે. આવી ફ્લાઈટ્સને પ્રતિબંધ દરમિયાન પણ ઉડાન ભરવાની છૂટ આપવામાં આવે છે.
એર ટ્રાફિક કંટ્રોલ સિસ્ટમના હાર્ડવેરમાં સર્જાઈ હતી ખામી
ડફીએ જણાવ્યું હતું કે એર ટ્રાફિક કંટ્રોલ સિસ્ટમમાં ઉપયોગમાં લેવાતું હાર્ડવેર ઘણું જૂનું છે અને તેમાં જ ટેકનિકલ ખામી સર્જાઈ હતી. તેમણે વધુમાં જણાવ્યું હતું કે અમેરિકાના રાષ્ટ્રપતિ છેલ્લા એક વર્ષથી કોંગ્રેસ પાસે નવી એર ટ્રાફિક કંટ્રોલ સિસ્ટમ માટે સંપૂર્ણ ભંડોળ ફાળવવાની માંગ કરી રહ્યા છે.
કોઈ સાયબર હુમલો થયો નહોતો
અમેરિકાના હોમલેન્ડ સિક્યુરિટી સેક્રેટરી માર્કવેન મુલિને સ્પષ્ટતા કરી હતી કે આ ઘટના પાછળ કોઈ સાયબર હુમલો જવાબદાર નહોતો. તેમણે એ પણ જણાવ્યું હતું કે આ ટેકનિકલ ખામીને માઇક્રોસોફ્ટ આઉટેજ સાથે પણ કોઈ સંબંધ નથી. આમ, ટેકનિકલ ખામી દૂર થયા બાદ અમેરિકામાં હવાઈ સેવાઓ ફરી શરૂ કરવામાં આવી છે, જોકે તમામ ફ્લાઈટ્સનું સંચાલન સંપૂર્ણપણે સામાન્ય થતાં હજુ થોડો સમય લાગી શકે છે.
