ઇઝરાયેલ પર રોકેટથી હુમલો, બાળકો સહિત 11ના મૃત્યુ; નેતન્યાહુએ હિઝબુલ્લાહને આપી ચેતવણી

ઈઝરાયલ દ્વારા નિયંત્રિત ગોલાન હાઈટ્સ પર શનિવારે અચાનક રોકેટ દ્વારા હુમલો કરવામાં આવ્યો હતો. બાળકો એક જગ્યાએ એકઠા થઈને ફૂટબોલ રમી રહ્યા હતા ત્યારે આ રોકેટ હુમલો કરવામાં આવ્યો હતો. આ રોકેટ હુમલામાં ઘણા બાળકો સહિત ઓછામાં ઓછા 11 લોકોના મોત થયા હતા. હુમલા બાદ અન્ય ઘણા લોકો ઘાયલ થયા હોવાનું પણ કહેવાય છે. આ રોકેટ હુમલો દક્ષિણ લેબનોન પર ઈઝરાયેલના હવાઈ હુમલામાં હિઝબુલ્લાહ જૂથના ત્રણ સભ્યોના માર્યા ગયાના થોડા કલાકો બાદ થયો હતો.

નેતન્યાહુ અમેરિકા ગયા છે 

ગયા વર્ષે ઓક્ટોબરમાં ઇઝરાયેલ અને હિઝબુલ્લાહ જૂથ વચ્ચેની લડાઇ શરૂ થઈ ત્યારથી આ હુમલો ઇઝરાયેલના પ્રદેશ પરનો સૌથી ઘાતક હુમલો છે, જેનાથી આ ક્ષેત્રમાં વ્યાપક સંઘર્ષની આશંકા છે. ઇઝરાયલના વડાપ્રધાન બેન્જામિન નેતન્યાહુના કાર્યાલયે કહ્યું કે તેઓ શક્ય તેટલી વહેલી તકે અમેરિકાથી ઘરે પરત ફરી રહ્યા છે. લેબનીઝ આતંકવાદી જૂથના જણાવ્યા અનુસાર શનિવારે અગાઉ, દક્ષિણ લેબનોનમાં ઇઝરાયેલી હવાઈ હુમલામાં હિઝબુલ્લાહના ત્રણ સભ્યો માર્યા ગયા હતા.

નેતન્યાહુએ હિઝબુલ્લાહને ચેતવણી આપી હતી

ઈઝરાયેલના વડાપ્રધાન બેન્જામિન નેતન્યાહુએ ચેતવણી આપી છે કે હિઝબુલ્લાને આ હુમલાની ભારે કિંમત ચૂકવવી પડશે, જે તેણે અત્યાર સુધી ચૂકવી નથી. તેમની ઓફિસે જણાવ્યું હતું કે શનિવારે ઇઝરાયલ દ્વારા નિયંત્રિત ગોલાન હાઇટ્સમાં સોકર મેદાન પર રોકેટ હુમલામાં ઓછામાં ઓછા 11 લોકો માર્યા ગયા હતા. જો કે ઈઝરાયેલ આ હુમલા માટે હિઝબુલ્લાહને જવાબદાર ઠેરવી રહ્યું છે, પરંતુ હિઝબુલ્લાએ કોઈપણ પ્રકારની ભૂમિકાનો ઈન્કાર કર્યો છે.